Ռիֆաթ Սերդարօղլու. «ԱԶԿ-ի 3 հիմնադիներն էլ ազգությամբ թուրք չեն»

Տարածաշրջան14:27, 04 Նոյեմբեր 2013

Ռիֆաթ Սերդարօղլու. «ԱԶԿ-ի 3 հիմնադիներն էլ ազգությամբ թուրք չեն»

Թուրքական «Քեմալիստլեր» կայքի հոդվածագիր Ռիֆաթ Սերդարօղլուն «Ահմեդ Քայայի կուսակցություն» վերնագրով հրապարակած հոդվածում քննադատել է քուրդ երաժիշտ ու երգահան Ահմեդ Քայային նախագահ Գյուլի կողմից տրված «Արվեսի և մշակույթի Նախագահական բարձր մեդալ» շնորհելը, ինչպես նաև անդրադարձել այդ երկրում ներկայիս կառավարող կուսակցության՝ ԱԶԿ-ի (Արդարություն և զարգացում կուսակցություն) երեք հիմնադիրների ազգային պատկանելություններին:

Սերդարօղլուն, իր հոդվածում Քայային անվանելով Քուրդիստանի բանվորական կուսակցության խոսնակ, ընդդիմադիր կեցվածք է ընդունում նախագահական պարգևի հանձնման դեմ: Ըստ հոդվածագրի՝ յուրաքանչյուրի ազգությունը, անկախ նրա վարած պաշտոնից, սուրբ է, և դա է մարդ լինելու և միասին ապրելու կանոնը: Սակայն, ըստ նրա, մի ուրիշ կանոն էլ կա, որի խախտման դեպքում անարխիա կսկսվի: Այդ կանոնը հետևյալն է՝ պետությունը ղեկավարողները չեն կարող իրենց ծագումը առաջնային համարելով, իսկ մյուս ինքնությունները անտեսելով՝ երկիր ղեկավարել:

Սերդարօղլուի խոսքերով ԱԶԿ-ն հիմնած և 12 տարի Թուրքիայի բարձրագույն պաշտոնները զբաղեցնող Գյուլ-Էրդողան-Արընչ եռյակից և ոչ մեկը ազգությամբ թուրք չէ. Գյուլի ընտանիքը 1915-ի բռնագաղթի ժամանակ Սիիրթից է գաղթել Կայսերի, Էրդողանի Վրացի լինելու մասին անձամբ ինքն է խոսել, իսկ Արընչը Մանիսայից գաղթած քուրդ ընտանիքի զավակ է՝ դերվիշ Մեմեդի թոռը:

Հեղինակը նկատում է, որ այդ թեմայի վերաբերյալ նրանք ոչ հերքում են ներկայացրել, ոչ էլ որևէ մեկնաբանություն թուրք ժողովրդին:

Այնուհետև, դիմելով նախագահ Գյուլին, հարց է ուղղում նրան, թե ինչպես կարելի մի նման բարձր պարգև հանձնել մի մարդու, ով Թուրքիան անվանել է անպատիվների երկիր:

Սերդարօղլուն չի մոռացել նաև Գյուլի Հայաստան այցն ու Թուրքիայում տեղի ունեցած պատասխան խաղի ժամանակ ժամանակ Ադրբեջանական դրոշների արգելքը՝ ավելացնելով որ այդ պաշտոնը, որը զբաղեցնում է վերջինս, մեծն Աթաթուրթի զբաղեցրած պաշտոնն է, և շատ շուտով կգա դրան հրաժեշտ տալու ժամանակը: