ERMENI HABER AJANSI

Թուրք սյունակագիր Օրալ Չալըշլարը, ով ակտիվորեն հետևում էր Ստամբուլում ընթացող «Իսլամացված հայեր» կոնֆերանսին, իր սյունյակում տեղադրել է համաժողովում ներկայացված տարբեր պատմություններ: Դա պատճառ է դարձել, որ նա ստանա բազմաթիվ նամակներ: Նամակագիրներից մեկը եղել է իշխող «Արդարություն և զարգացում» կուսակցությունից 2 անգամ պատգամավոր ընտրված Վահիթ Էրդեմը: Վերջինս հանդիմանել է  հոդվածագրին Հայոց ցեղասպանության փաստը ընդունելու և Էրզրումում «հայերի կատարած վայրագությունների» մասին լռելու համար:

Ի պատասխան  Էրդողանի կուսակցության ներկայացուցչի և այլ բազմաթիվ ընթեցողների հանդիմանությանը՝ Օրալը «Ռադիքալ» թերթում հրապարակված իր հոդվածում շեշտել է, որ Էրզրումում տեղի ունեցած դեպքերը դեռ չեն նշանակում, որ չի եղել է 1915-ի սարսափելի ոճրագործությունը:

Հոդվածագիրը ներկայացրել է գրող Նեսիմ Ավադյա Իզրաիլի «1915թ. ապրիլի 24. Ստամբուլ, Չանքըրը, Այաշ, Անկարա» աշխատությունը, որը պատմում է 250 հայ մտավորականի ճակատագրի մասին: Հայ մտավորականները՝ պատգամավոր, իրավաբան, ճարտարապետ, երաժիշտ, բանաստեղծ, լրագրող, գործարար, առևտրական որպես քաղբանտարկյալ ուղարկվել են Չանքըրը և Այաշ: 250 հոգուց 174-ը սպանվեցին, իսկ 76-ը կարողացան փրկվել:

Օրալը գրում է, որ սպանվածների շարքում էր նաև հայ բանաստեղծ, բժիշկ Ռուբեն Սևակը, որը բժշկի մասնագիտությունը ստացել էր Լոզանում, ամուսնացել գերմանուհու հետ, սակայն իր գործունեությունը շարունակելու համար 1914 վերադարձել էր Ստամբուլ:  Հոդվածի հեղինակը պատմում է, որ Սևակի դուստրը՝ Շամիրամը 2005 թվականին տված հարցազրույցի ժամանակ ասել է, որ հայրը Չանքըրըում բուժել է մի աղջկա, ում հայրը առաջարկել է Ռուբենին ամուսնանալ իրեն սիրահարված աղջկա հետ և իսլամ ընդունել: Սակայն Սևակը հրաժարվում է՝ ասելով, «Ես ո՛չ իմ ազգությունը , ո՛չ էլ կնոջս հանդեպ ունեցած հարգանքս ուրանալ չեմ կարող»:

«Սա 1915-ից ընդամեն մի պատառիկ է: Հարյուր հազարավոր հայեր ուղարկվել են ստույգ մահվան: Էրդեմին գրած  պատասխանի մեջ շեշտել եմ, որ մենք ստիպված չենք պաշտպանել հանցագործությունները միայն այն պատճառով, որ թուրք ենք:

Վերջնարդյունքում պետության գիտակցված քաղաքականության հետևանքով աքսորի և կոտորածների միջոցով բնաջնջվել է մի ամբողջ ժողովուրդ, որը հազարավոր տարիներ ապրել է այս հողերում: 2015 թվականին մնացել է մեկ տարի: Մեր խղճի առջև որպես հաշվետվություն, կարող ենք ապրիլի 24-ին հարգել մեր քաղաքացիների հիշատակը և ի լուր աշխարհի հայտարարել, որ  մենք անընդունելի ենք համարում այդ կոտորածները»,- եզրափակում է թուրք հոդվածագիրը:

Ermenihaber.am