Zaman. Անկարան մինչև 2015-ը ցանկանում է կարգավորել հարաբերությունները Երևանի հետ

Քաղաքական08:02, 16 Նոյեմբեր 2013

Zaman. Անկարան մինչև 2015-ը ցանկանում է կարգավորել հարաբերությունները Երևանի հետ

Վերջերս աշխատանքային այցով Շվեյցարիա մեկնած Թուրքիայի արտգործնախարար Ահմեթ Դավութօղլուն այնտեղի պաշտոնատար այրերի հետ հանդիպումների ժամանակ ցանկություն էր հայտնել, որ Շվեյցարիան միջնորդություն հանդես բերի Հայաստան-Թուրքիա հարաբերությունների կարգավորման հարցում:

Ըստ թուրքական «Զաման» պարբերականի «Հայաստանին համոզեք հետ քաշվել» վերտառությամբ հրապարակման` Դավութօղլուն իր զրուցակիցներին հետևյալ ուղերձն է հղել. «Թուրքիան պատրաստ է Հայաստանի հետ կարգավորել հարաբերությունները, կյանքի կոչել արձանագրությունները: Բայց կա պայման. Հայաստանը պետք է սկսի դուրս գալ «Ադրբեջանի գրավյալ տարածքներից»: Համոզեք Հայաստանի ղեկավարությանն անել դա և մենք կբացենք սահմանը: Սպասում ենք ձեր օգնությանը»:

Աղբյուրի պարզաբանմամբ` խոսքը վերաբերել է Լեռնային Ղարաբաղին հարակից այն 7 շրջաններին, որոնք գտնվում են հայկական զորքերի հսկողության տակ:

Շվեյցարացի պաշտոնակցի հետ հանդիպման ժամանակ Թուրքիայի արտաքին քաղաքական գերատեսչության ղեկավարն ասել է, որ իրենք փորձում են կառուցողական մտքերով ու նոր գաղափարներով լուծում գտնել հարցին:

«Զաման»-ը, վկայակոչելով իր անանուն դիվանագիտական աղբյուրները, նշում է, որ Անկարան ցանկություն ունի Հայոց ցեղասպանության հարյուրամյա տարելիցին ընդառաջ, մինչև 2015 թվականը կարգավորել հարաբերությունները պաշտոնական Երևանի հետ: Բայց ադրբեջանական գործոնը որպես խանգարող հանգամանք դեռևս մնում է:

Մի թուրք պաշտոնյա, որի անունը չի նշվում, «Զաման»-ին ասել է, որ Թուրքիան սահմանը փակել է ոչ թե Ղարաբաղի, այլ հարակից շրջանների պատճառով: Ըստ նրա` Հայաստանը կարող է այդ 7 շրջաններից 5-ը վերադարձնել: Այդ դեպքում ադրբեջանական իշխանությունները դեմ չեն լինի հայ-թուրքական սահմանի բացմանը:

Ermenihaber.am