Դավութօղլուն պարզաբանել է իր վաշինգտոնյան ելույթի որոշ կողմերը

Քաղաքական08:10, 20 Նոյեմբեր 2013

Դավութօղլուն պարզաբանել է իր վաշինգտոնյան ելույթի որոշ կողմերը

Թուրքիայի արտաքին գործերի նախարար Ահմեթ Դավութօղլուի` Վաշինգտոնի «Բրուքինգս» վերլուծական կենտրոնում ունեցած ելույթը ոչ միանշանակ է ընդունվել Թուրքիայում: Մասնավորապես Գեզիի հայտնի իրադարձությունների վերաբերյալ նրա հնչեցրած որոշ արտահայտություններ տարընկալումների տեղիք է տվել:

Նախարարը Twitter միկրոբլոգի իր էջում գրառում է կատարել այդ մասին` փորձելով պարզաբանում մտցնել իր ասածների մեջ: Այն, որ ինքը հպարտանում է Գեզիի իրադարձություններով, ըստ Դավութօղլուի, թյուրիմացություն է, և ինքը նման արտահայտություն չի արել:

«Գեզիի իրադարձությունների վերաբերյալ նախկինում ինչ ասել եմ Թուրքիայում և արտերկրում, նույնը կրկնել եմ Վաշինգտոնում: Ես հպարտ եմ ոչ թե Գեզիի իրադարձություններով, այլ այն բանով, որ այդ հարցում մեր երկիրը դրսևորել է եվրոպական չափանիշներին համապատասխան կեցվածք: Թող ոչ ոք չփորձի իմ խոսքերից բոլորովին այլ բան բխեցնել»,- գրել է Թուրքիայի արտաքին գերատեսչության ղեկավարը:

Ermenihaber.am