Էրդողանը շահել է թուրք պատգմավորի դեմ ներկայացրած դատական հայցը

Քաղաքական13:58, 21 Նոյեմբեր 2013

Էրդողանը շահել է թուրք պատգմավորի դեմ ներկայացրած դատական հայցը

Թուրքիայի վարչապետ Ռեջեփ Թայիփ Էրդողանը Թուրքիայի խորհրդարանի «Ազգայնական Շարժում կուսակցության» (ԱՇԿ-MHP) Բալըքէսիր շրջանի պատգամավոր Ահմեթ Դուրան Բուլութի դեմ դատական հայցը շահել է, ըստ որի, վերջինս Թուրքիայի վարչապետին պետք է վճարի 5000 թուրքական լիրա փոխհատուցում:

Անկարայի դատարանում տեղի ունեցած դատական նիստին մասնակցել են Ռեջեփ Էրդողանի և Մուամմեր Ջեմալօղլուի դատապաշտպաններ Մուամմեր Ջեմալօղլուն և Յուկսել Էվջին:

Դատավոր Իլվան Չաղլար Ույսալը, լսելով դատապաշտպանների կողմից ներկայացված գործի մանրամասները, վճիռ կայացրեց: Թուրքական «Անադոլու» լրատվական գործակալությունը հայտնում է, որ դատավորը մասամբ ընդունելով ներկայացված հայցը՝ պատգամավորին ենթարկել է տույժի, ըստ որի, վերջինս պարտավորվում է որպես փոխհատուցում Էրդողանին վճարել 5000 թուրքական լիրա:

Հիշեցնենք որ, ըստ Էրդողանի փաստաբանների՝ սույն թվականի մարտի 8-ին տեղի ունեցած մամուլի ասուլիսի ժամանակ պատգամավոր Բուլութի կողմից ոտնահարվել է Էրդողանի իրավունքները: Վարչապետի փաստաբանները վերոնշյալ մեղադրանքով դատական հայց են ներկայացրել ընդդեմ թուրք պատգամավորի՝ պահանջելով 50000 թուրքական լիրա բարոյական փոխհատուցում:

Ermenihaber.am