ERMENI HABER AJANSI

Թուրքիայի արտաքին գործերի նախարարությունը այդ երկրում գործող օտարերկրյա ներկայացուցչությունների կողմից 2009 թվականին ստացել է 37.870, 2010-ին` 36.812, 2011-ին` 36.227, 2012-ին` 31.157 նոտա: Իսկ ընթացիկ տարում արդեն ստացել է 7.301 նոտա:

Այս մասին խորհրդարանի ամբիոնից հայտնել է արտգործնախարար Ահմեթ Դավութօղլուն` պատասխանելով ընդդիմադիր ժողովրդահանրապետական պատգամավոր Սեզգին Թանրըքուլուի համապատասխան հարցին:

Միջանկյալ նշենք, որ նոտան պաշտոնական բնույթի դիվանագիտական գրության մի տեսակ է, որն օգտագործվում է միջպետական կամ միջգերատեսչական շփումներում: Այն կարող է լինել շնորհավորանքի, պատվիրակությունների կազմի ծանուցման, քաղաքական, տնտեսական, մշակութային, վարչական և այլ հարցերի բարձրացման համար:

Այն հարցին, թե 2009 թվականից մինչև օրս քանի արտակարգ և լիազոր դեսպան է հետ կանչվել Անկարա, Դավութօղլուն պատասխանել է, որ 4 տարվա ընտացքում հետ է կանչվել Թուրքիայի 4 դեսպան: Նրանց հետկանչի պատճառներին անդրադառնալով` Դավութօղլուն մանրամասնել է.

«Առաջինը հետ ենք կանչել Ֆրանսիայում Թուրքաիայի դեսպանին` ցույց տալու մեր արձագանքը ֆրանսիական սենատում հայտնված Հայոց ցեղասպանության մասին բանաձևին: Երկրորդը հետ ենք կանչել Իսրայելի մեր դեսպանին Մավի մարմարա նավի վրա իսրայելցի հատուկջոկատայիննների հարձակման և Թուրքիայի 9 քաղաքացու սպանության պատճառով: Այնուհետև եղել է Դամասկոսի դեսպանի հետկանչը այդ երկրում ծավալվող բախումների պատճառով: Եգիպտոսի մեր դեսպանին հետ ենք կանչել տեղի ունեցած ռազմական հեղաշրջման վերաբերյալ խորհրդակցություններ անցկացնելու համար, ինչից հետո նա կրկին մեկնել է Կահիրե: Այն բանից հետո, երբ Ֆրանսիայի խորհրդարանի վերոնշյալ օրինագիծը ձախողվեց, Փարիզի մեր դեսպանը ևս վերադարձավ իր պարտականությունների կատարմանը»:

Ermenihaber.am