ERMENI HABER AJANSI

Թուրքական լրատվամիջոցները շարունակում են օրակարգում պահել հայ-թուրքական թեման, որը հիմնականում կապում են Ղարաբաղի շուրջ ընթացող բանակցությունների հետ՝ մեջբերելով Դավութօղլուի խոսքերը. «Հայաստանը Ղարաբաղի հարակից շրջաններից հրաժարվելու  պարագայում, Թուրքիան հայ-ադրբեջանական գործընթացին զուգահեռ կարող է բացել հայ-թուրքական սահմանը»:

Այս անգամ թեմային անդրադարձել է թուրքական  «Միլլիյեթ» պարբերականը, ըստ որի, Ադրբեջանի և Հայաստանի միջև Լեռնային Ղարաբաղի կարգավորման հարցում համաձայնության հասնելուց հետո, Անկարան Երևանի հետ երկկողմ հարաբերությունների կարգավորման գործընթացը արագացնելու համար գործի է անցել: Այսպիսով՝ Անկարան Հայաստանի հետ սահմանի հնարավոր բացման վերաբերյալ ազդակներ է հաղորդում: իսկ սահմանի բացումն էլ կախված է Ադրբեջանի հետ Հայաստանի հարաբերություններից:

Պարբերականը, ներկայացնելով Ադրբեջանի և Հայաստանի նախագահների Վիեննայի հանդիպումից առաջ թուրքականի կողմի հանդիպումները (Ալիևի այցը, Դավութօղլուի հանդիպումը ԱՄՆ պետքարտուղար Ջոն Քերրիի հետ), նշում է, որ  Ալիև-Սարգսյան հանդիպման ժամանակ համաձայնություն է ձեռք բերվել 2013 թվականի վերջում տարածաշրջանում աշխատանքներ սկսելու վերաբերյալ: Իսկ Հայաստանի և Ադրբեջանի արգործնախարարները  դեկտեմբերի 5-6-ին հանդիպելու են Կիևում՝ հիմնախնդրի կարգավորման հարցում մտքեր փոխանակելու համար:

Նշվում է, որ Անկարան պատրաստ է Հայաստանի հետ  կարգավորման գործընթացին, որը ներառում է նաև սահմանների բացումը:  Անկարան այս գործընթացի առաջխաղացման ընթացքում շարունակելու է  Ադրբեջանի հետ համաձայնեցված քաղաքականություն վարել:
Թերթը հայտնում է, որ Թուրքիայի արտգործնախարար Դավութօղլուն ղարաբաղյան հարցը բարձրացնելու է նաև Ռուսաստանում, ուր մեկնելու է վարչապետ Էրդողանի հետ միասին:

Ermenihaber.am