Տեղի է ունեցել Թուրքիա-Ռուսաստան բարձր մակարդակի համագործակցության խորհրդի նիստը

Տարածաշրջան13:02, 22 Նոյեմբեր 2013

Տեղի է ունեցել Թուրքիա-Ռուսաստան բարձր մակարդակի համագործակցության խորհրդի նիստը

Սանկտ Պետերբուրգում Թուրքիայի վարչապետ Ռեջեփ Թայիփ Էրդողանի և Ռուսաստանի նախագահ Վլադիմիր Պուտինի նախագահությամբ սկսվել Թուրքիա-Ռուսաստան բարձր մակարդակի համագործակցության խորհրդի 4-րդ նիստը: Նիստից առաջ ելույթ ունենալով՝ Էրդողանը նախ շնորհակալություն է հայտնել Պուտինին ընդունելության համար, ապա հայտարարել է, որ վերջին տարիներին Ռուսաստանի ու Թուրքիայի հարաբերությունները այնքան ինտենսիվ են զարգանում, որ շատ երկրների համար կարող են նախանձի առարկա դառնալ: Անդրադառնալով երկու երկրների միջև առևտրաշրջանառության ծավալին՝ Էրդողանը նշել է, որ ներկայիս 35 մլրդ-ի ծավալը նախատեսում են մինչև 2020 թվականը հասցնել 100 մլրդ-ի:

Թուրքական «Հաբեր 3» էլեկտրոնային լրատվականի հաղորդմամբ՝ Էրդողանն անդրադարձել է մշակույթի բնագավառում երկու երկրների համագործակցությանը՝ ասելով, որ իրենք ամեն կերպ կաջակցեն Անկարայում Ռուսաստանի կողմից կառուցվող մշակույթի կենտրոնին:

Էրդողանը նշել է նաև, որ Թուրքիա այցելող ռուս զբոսաշրջիկների թիվը հասնում է 4 միլիոնի՝ ավելացնելով, որ դա նպաստում է երկու ժողովուրդների մերձեցմանը:

Թուրքիայի վարչապետն անդրադարձել է նաև Ռուսաստանի նախագահի հետ տարածաշրջանային խնդիրների թեմայով ունեցած քննարկմանը՝ ասելով. «Հավատում եմ, որ Թուրքիան և Ռուսաստանը տարածաշրջանի համար իրենց ուսերին կարևոր պարտականություններ ունեն: Հավատում եմ, որ թե՛ Հայաստանի և Ադրբեջանի միջև առկա խնդիրների, թե՛ սիրիական խնդրի, և թե՛ Իրաքում տեղի ունեցող զարգացումների կապակցությամբ համատեղ քայլեր ունենք իրականացնելու»:

Բարձրաստիճան ռազմավարական խորհրդի նիստի ավարտին նախատեսված պաշտոնական ընթրիքից հետո Պուտինն ու Էրդողանը կմասնակցեն նախօրոք համաձայնեցված պայմանագրերի ստորագրման արարողությանը, որից հետո էլ հանդես կգան համատեղ մամուլի ասուլիսով :

Ermenihaber.am