Թուրքերը Հայաստանի արտաքին քաղաքականությունն անվանում են խորամանկ և պատեհապաշտական

Քաղաքական07:49, 02 Դեկտեմբեր 2013

Թուրքերը Հայաստանի արտաքին քաղաքականությունն անվանում են խորամանկ և պատեհապաշտական

Օրերս Լիտվայի մայրաքաղաք Վիլնյուսում տեղի ունեցած Եվրամիության (ԵՄ) արևելյան գործընկերության գագաթաժողովը` դուրս չի մնացել թուրքական լրատվամիջոցների ուշադրությունից: Նշենք, որ արևելյան գործընկերության մեջ ընդգրկված են նախկին խորհրդային 6 հանրապետություններ:

Քեմալիստական ուղղվածության թուրքական «Յենի չաղ» թերթի էլեկտրոնային կայքը «Հայաստանի նենգությունը ԵՄ գագաթաժողովին» վերտառությամբ հրապարակման մեջ անդրադառնում է Հայաստանի վարած քաղաքականությանը` կապված Մաքսային միության և ասոցացման պայմանագրի նախաստորագրման հետ: Պաշտոնական Երևանին տրվում են «խորամանկ» և «պատեհապաշտ» բնորոշումները: Ուշադրություն է հրավիրվում այն հանգամանքի վրա, որ Հայաստանի նախագահ Սերժ Սարգսյանը Հայոց ցեղասպանության ճանաչման հետ Թուրքիայի հաշտվելը դիտել է եվրոպական ընտանիքում նրա ներգրավման գլխավոր պայմանը:

Հիշեցնենք, որ Արևելյան գործընկրության երրորդ գագաթաժողովում ունեցած ելությի ժամանակ նախագահ Սերժ Սարգսյանը Թուրքիայի վերաբերյալ ասել էր մասնավորապես հետևյալը. «Կարծում եմ, որ եվրոպական արժեքների հետևողական որդեգրումը կարող է օգնել Թուրքիային սեփական անցյալի հետ հաշտվելու հարցում: Այսօր հազարավոր թուրքեր դատապարտում են Հայոց ցեղասպանությունը և կանգնում մեր կողքին՝ հարգելու Ցեղասպանության զոհերի հիշատակը: Կարծում եմ, որ Հայոց ցեղասպանության հարյուրամյակի նախաշեմին Թուրքիայի իշխանությունները պետք է կարողանան կամք ցուցաբերել ու հրաժարվել ժխտողական քաղաքականությունից: Եվրամիության հետ ինտեգրումը որպես եվրոպական երկիր շարունակելու հարցում Թուրքիայի առջև դեռևս շարունակում են ծառացած մնալ Եվրոպայի վերջին փակ սահմանը բացելու և Հայաստանի հետ դիվանագիտական հարաբերություններ հաստատելու մարտահրավերները: Եվրոպական Միության անդամ-պետություններից, որպես մեր գործընկերներից, մենք ակնկալում ենք Թուրքիայի կողմից Հայաստանի ապօրինի շրջափակման վերացման հարցում լիարժեք ներգրավում և հետևողականություն»:

Ermenihaber.am