Պուտինի հայաստանյան այցը` թուրքական մամուլում

Քաղաքական13:48, 03 Դեկտեմբեր 2013

Պուտինի հայաստանյան այցը` թուրքական մամուլում

Ռուսաստանի նախագահ Վլադիմիր Պուտինի` դեկտեմբերի 2-ին Հայաստան կատարած պետական այցը դուրս չի մնացել թուրքական լրատվամիջոցների ուշադրությունից: Ավելի քան 3 տասնյակ լրատվամիջոցներ (լրատվական կայքեր, գործակալություններ, օրաթերթերի էլ. կայքեր) լուսաբանել են այցի հիմնական դետալները:

Հիմնականում լրատվական ձևաչափով աչքի ընկնող հրապարակումների գլխավոր երանգավորումը վերաբերում է Պուտինի այցի և Մաքսային միության դեմ ուղղված բողոքի միջոցառումներին: Ընդգծված են նաև այն իրողությունները, որ Պուտինը հարգանքի տուրք է մատուցել Հայոց ցեղասպանության զոհերի հիշատակին` այցելելով Ծիծեռնակաբերդ և Կովկասում ամրապնդել իր դիրքերի ամրապնդելու մասին Ռուսաստանի վճռականության մասին ՌԴ նախագահի հայտարարությունը:

Zaman

«ՌԴ նախագահի այցը Կարսին ու Արդահանին շատ մոտ գտնվող Գյումրի, «Թուրքիայի քթի տակ տեղի ունեցող կարևոր իրադարձություն է: Պուտինի Գյումրի այցելության մասին հայկական և ռուսական մամուլը գուցեև շատ չխոսի, բայց, ըստ մեզ, դա կարևոր իրադարձություն է: Այդ այցելությամբ Պուտինը մեկ անգամ ևս ընդգծում է հայ-ռուսական դաշինքի ռազմական ասպեկտն ու դրա կարևորությունը և հիշեցնում, որ Հայաստանի անվտանգության երաշխավորը Ռուսաստանն է»:

Sabah

«Արևմուտքը ՌԴ նախագահին մեղադրում է նախկին սովետմիության երկրների վրա ճնշում գործադրելու մեջ: ՌԴ նախագահ Վլադիմիր Պուտինի այցը Հայաստան մեկնարկեց Թուրքիային սահմանակից Գյումրի քաղաքից: 500 հոգանոց մարդկանց բազմությունը իր բողոքը հայտնեց` վանկարկելով «մենք չենք ուզում սովետիություն»:

Hurriyet

«Մինչ ՌԴ նախագահը կժամաներ մայրաքաղաք Երևան, ցուցարարներն արդեն սկսել էին բողոքի միջոցառումներ անցկացնել` ընդդեմ Մաքսային միությանը Հայաստանի անդամակցությանը: Ռուսաստանը ներկայումս մնում է Հայաստանի ամենամեծ առևտրային գործընկեր»:

Milliyet

«Հայերը դուրս են եկել փողոց` Պուտինի դեմ բողոքի: Եվրամիության հետ մերձեցմանը խոչընդոտող Ռուսաստանին հակազդեցություն ցույց տվող Ուկրաինան փաստորեն միակ երկիրը չէ: Ցուցարարները պարզել են «Պուտին տուն գնա», «ոչ սովետմիությանը» գրությամբ պաստառներ»:

Taraf

«Ցույցերը Պուտինի դեմ են, Պուտինը` ցույցերի: Ռուսաստանի նախագահը Հայաստան կատարած այցի ժամանակ քննադատեց Ուկրաինայում կազմակերպվող բողոքի ցույցերը, բայց ինքն էլ արժանացավ բողոքի ցույցի Հայաստանում»:

Ermenihaber.am