ՀՀ արտգործնախարարությունից հերքել են նոր ճանապարհային քարտեզի մասին լուրը

Քաղաքական13:02, 10 Դեկտեմբեր 2013

ՀՀ արտգործնախարարությունից հերքել են նոր ճանապարհային քարտեզի մասին լուրը

Հայաստանի արտաքին գործերի նախարարությունը հանդես է եկել «Առավոտ» օրաթերթի դեկտեմբերի 10-ի համարում հրապարակված այն լուրի հերքմամբ, ըստ որի, Հայաստանը հայ-թուրքական հարաբերությունների կարգավորման նոր ճանապարհային քարտեզ է մշակել և փոխանցել Թուրքիայի արտգործնախարար Ահմեթ Դավութօղլուին: Այս մասին «ՍիվիլՆեթ»-ի հետ զրույցում տեղեկացրել է ՀՀ արտաքին գործերի նախարարի մամուլի խոսնակ Տիգրան Բալայանը:

Հիշեցնենք, որ ՀՀ արտգործնախարարության «Առավոտ»-ի աղբյուրի պնդմամբ` նշյալ ճանապարհային քարտեզը երեք առանցքային շեշտադրում է ունեցել.

1. Թուրքիան հրապարակավ ընդունում է Հայոց ցեղասպանության փաստը, իր պատասխանատվությունը և ապաշխարում աշխարհասփյուռ հայության առջև

2. Անհապաղ բացում է Հայաստան-Թուրքիա սահմանը և դիվանագիտական հարաբերություններ հաստատում Հայաստանի հետ,

3. Այնուհետև ԼՂՀ հիմնախնդրի կարգավորման հարցում Թուրքիան կարողանում է հանդես գալ խաղաղարար ջանքերով և իրավունք է ստանում հասարակական ծրագրեր իրականացնել պատերազմի հռետորության վերահսկման, սահմանային միջադեպերի կանխման, դիպուկահարների հետ քաշման և հասարակություններին խաղաղության պատրաստման ոլորտներում:

«Ենթադրվում է, որ Դավութօղլուի երևանյան այցի շրջանակներում նա հնարավորություն կունենա Էդվարդ Նալբանդյանին տեղեկացնել պաշտոնական Անկարայի դիրքորոշումը Հայաստանի կողմից առաջ քաշված ճանապարհային քարտեզի վերաբերյալ»,- գրել էր թերթը:

Ermenihaber.am