ERMENI HABER AJANSI

Թուրքիայի արտգործնախարար Ահմեթ Դավութօղլուի` Երևան կատարած այցն արժանանում է տարբեր գնահատականների ու մեկնաբանությունների թուրքական մամուլում: Մասնավորապես «Դունյա» կայքը «Դավութօղլուն` 4 անց Երևանում» վերտառությամբ հոդված է հրապարակել, որտեղ դիտարկվում են այցի բնույթը, բովանդակությունը և նպատակները:

«Սևծովյան տնտեսական համագործակցություն» կազմակերպության նիստին մասնակցելու բացի Թուրքիայի արտաքին գերատեսչության ղեկավարի այցն այլ ասպեկտներ էլ է ներառում: Ընդգծվում է այն հանգամանքը, որ Դավութօղլուի այցը պետք է դիտել հայ-թուրքական հարաբերությունների կարգավորման շարունակությանն ուղղված կամքի դրսևորման ժեստ:

«Այդ այցով Անկարան ցույց տված կլինի, որ չնայած 3 տարվա դադարին, կարգավորման ջանքերը չեն դադարեցվել, առնվազն ցույց կտա, որ կարգավորման գործընթացի կասեցնողն ինքը չի եղել: Բացի այդ ուղիղ շփումը երկու երկրների հարաբերությունների կարգավորման գործընթացը վերակենդանացնելու ուղղությամբ կատարված համատեղ քայլ կլինի»:

Միևնույն ժամանակ հոդվածում  նշվում է, որ հայ-թուրքական կարգավորման գործընթացի մեկնարկից ի վեր Թուրքիայի պաշտոնական դիրքորոշումը չի փոխվել: Այն է` Անկարան ցանկանում է լավացնել հարաբերությունները Երևանի հետ, բայց ճիշտ չի համարում դա անջատել տարածաշրջանային խաղաղության ամբողջական գործընթացից:

«Անկարան տարածաշրջանի խաղաղության և կայունության թեման դիտում է որպես մեկ ամբողջություն և Հայաստան-Թուրքիա հարաբերությունների կարգավորման ու հայ-ադրբեջանական հակամարտության լուծման ջանքերը համարում միմյանց  աջակցող է հանգամանքներ»:

Նշվում է, որ Անկարայի այն տեսակետը, թե ղարաբաղյան հիմնախնդրի հարցում պետք է առաջխաղացում ապահովող քայլ կատարվի, իրականում ոչ թե պայման է, այլ տարածաշրջանային խաղաղության գործընթացի հրամայականով առաջին պլան եկած անհրաժեշտություն: Ըստ աղբյուրի` Դավութօղլուն Երևանում ուշադրություն է հրավիրելու հենց այդ հանագամանքի վրա:

Հայ-թուրքական հարաբերությունների կարգավորման գործըթնացում ադրբեջանական գործոնի ունեցած դերի վերաբերյալ անդրադարձում հղում է տրվում դիվանագիտական աղբյուրներին և նշվում, որ Անկարան կարգավորման գործընթացը կոորդինացնում է Ադրբեջանի հետ:  

«Դիվանագիտական աղբյուրները հայտնում են, որ հունիս ամսից սկսած Թուրքիայի և Ադրբեջանի միջև իրականացվում են ամենամսյա բարձր մակարդակի փոխայցեր: Երկուստեք միմյանց իրազեկում են գործըթնացների մասին և խորհրդակցական աշխատանքներ տանում»:

Ermenihaber.am