Հայդար Բաշ. «Թուրքիայից հողային պահանջներ ունեցող հայերը Դավութօղլուին ընդունում են Արարատի նկարի տակ»

Քաղաքական13:51, 16 Դեկտեմբեր 2013

Հայդար Բաշ. «Թուրքիայից հողային պահանջներ ունեցող հայերը Դավութօղլուին ընդունում են Արարատի նկարի տակ»

Թուրքիայի արտգործնախարար Ահմեթ Դավութօղլուի` Հայաստան կատարած այցը տարատեսակ բողոքների ու դժգոհությունների տեղիք է տվել թուրք հանրության շրջանում: Դավութօղլուի երևանյան այցը քննադատության է ենթարկվում ոչ միայն ընդդիմադիր ուժերի, այլ նաև մամուլի կողմից: Մասնավորապես «Յենի մեսաժ» թերթի վերլուծաբան Հայդար Բաշն իր «Հակաօրինական քաղաքականություն» հոդվածում դատապարտում է Դավութօղլուի այցը և դրևսորած վարքը:

Հոդվածի հեղինակի բնորոշմամբ` դեկտեմբերի 12-ը վերածվել է Թուրքիայի արտաքին քաղաքականության համար ամոթալի մի օրվա: Իսկ թե ինչու է այդ կարծիքին, Հայդար Բաշը պարզաբանել է շարունակության մեջ` նշելով, որ Դավութօղլուին Երևանում դիմավորել են բողոքի միջոցառումներով, ստիպել նրան հյուրանոց մուտք գործել հետնադռնով, ՀՀ արտգործնախարարն իր բացման խոսքում ծանր մեղադրանքներ է հասցեագրել Թուրքիային, իսկ Դավութօղլուն հանդուրժել է այդ ամենը և դեռ մի բան էլ շնորհակալություն հայտնել հայկական հյուրընկալության համար:

«ՀՀ արտգործնախարար Նալբանդյանը Արարատ լեռան նկարի տակ անցկացված հանդիպման ժամանակ կոչ է արել կյանքի կոչել 2009-ի արձանագրությունները: Իրենց սահմանադրության մեջ (ՀՀ Անկախության հռչակագիր – խմբ.) Թուրքիայից հողային պահանջներ ունենալու մասին ամրագրած հայերը Թուրքիայի արտգործնախարարին ընդունում են Արարատ լեռան նկարի տակ: Իսկ, ըստ նրանց, Արարատը թուրքերինը չէ, այլ` իրենցը»,- դժգոհում է հոդվածագիրը:

Հայդար Բաշը համոզմունք է հայտնում, որ Սիրիայի նկատմամբ վարած քաղաքականության պատճառով սասանված Թուրքիայի հեղինակությունը վերջնականապես ոչնչացավ Դավութօղլույի հայաստանյան այցով:

Ermenihaber.am