Ի՞նչ է պատրաստվում անել Թուրքիայի արտգործնախարարությունը

Քաղաքական08:24, 17 Դեկտեմբեր 2013

Ի՞նչ է պատրաստվում անել Թուրքիայի արտգործնախարարությունը

Երևան կատարած այցի ժամանակ Թուրքիայի արտգործնախարար Ահմեթ Դավութօղլուի հնչեցրած որոշ արտահայտություններ շարունակում են մտորումների ու մեկնաբանությունների տեղիք տալ լրատվական շրջանակներում: Հերթական տարակուսանքն է հայտնել թուրքական «Սանսուրսուզ» լրատվական կայքը «Ի՞նչ է պատրաստվում անել արտգործնախարարությունը» վերտառությամբ հրապարակված նյութում:

Քննարկման առարկա է դարձել է Դավութօղլուի հատկապես այն գնահատականը, որ նա լրագրողների հետ հանդիպման ժամանակ տվել էր 1915-ի ողբերգությանը: Դավութօղլուն այն անվանել էր երիտթուրքերի կողմից իրականացված սխալ և անմարդկային արարք:

Վերոնշյալ կայքը Թուրքիայի արտգործնախարարի այդ բնորոշումը համարում է ցնցող արտահայտություն և մատնանշում, թե ինչ հետևանքների է հանգեցրել: Նշվում է, որ ֆրանսիական լրատվական կայքերից մեկը, Դավութօղլուի պահվածքից ելնելով, գրել է, թե Թուրքիայի արտգործնախարարը երկու երկրների հարաբերությունների կարգավորման համար հայերի առաջ խնդրանքով է հանդես եկել:

«Հայոց ցեղասպանությունը անմարդկային արարք անվանած և երկու երկրների հարաբերությունների կարգավորումը խնդրող Ահմեթ Դավութօղլու և թուրքական կառավարությունը հիմա ի՞նչ, պատրաստվում են ընդունե՞լ Ցեղասպանությունը»,- կասկած է հայտնում է «Սանսուրսուզ»-ը:

Ermenihaber.am