ERMENI HABER AJANSI

Իսլամական աշխարհում ակտիվ պետության դեր ստանձնելու հարցում լիակատար ձախողում ունեցած Թուրքիան այժմ ուղղվել է դեպի Հայաստան ու Հունաստան: Այս կարծիքին է թուրքական «Յենի մեսաժ» թերթի վերլուծաբան Մուհարրեմ Բայրաքթարը: Ըստ նրա` Անկարան հավանաբար մտածել է, թե իսլամական աշխարհում բան դուրս չեկավ, թեկուզ թող քրիստոնյա աշխարհում ինչ-որ բան դուրս գա: Բայց այդտեղ ևս տխուր արդյունքի դեմ հանդիման եղավ:

Անդրադառնալով Թուրքիայի արտգործնախարար Ահմեթ Դավութօղլուի երևանյան այցին` Բայրաքթարը հստակ նշում է, որ հայկական կողմը Թուրքիայից պահանջում է տեր մնալ ցյուրիխյան արձանագրություններում դրած ստորագրությանը:

«Իսկ այդ արձանագրությունները Թուրքիային նստեցնելու են ցեղասպանություն գործած մեղավորի աթոռին ու Հայաստանի առաջ ճանապարհ են բացելու հատուցման և տարածքային պահանջների համար»,- մեկ այլ սյունակագիր տկն Գյուլսերեն Այթաշի խոսքերն է մեջբերում հոդվածագիրը:

Բայրաքթարը վերջում հիշեցնում է, որ Այթաշը 2013-ի ապրիլին Թուրքիայի խորհրդարանին նամակ էր հղել, որտեղ շարադրել էր անհրաժեշտաբար իրականացվելու ենթակա 4 պահանջ:

1. Հետ կանչել արձանագրությունները Թուրքիայի խորհրդարանից և չեղյալ հայտարարել:

2. Կատարել հարկ եղած սահմանադրական փոփոխություններ միջազգային պայմանագրերի բնույթը Թուրքիայի սահմանադրության հետ հակասության չմտնցելու համար:

3. Այդուհետև Հայաստանի հետ ստորագրվելիք ցանկացած պայմանագրի տեքստում ամրագրել մի կետ, ըստ որի, այդ պայմանագիրը չպետք է կիրառվի կամ մեկնաբանվի 1921-ին կնքված Կարսի պայմանագրին հակառակ:

4. Ի պատասխան այն երկրների խորհրդարանների, որոնք կընդունեն Հայոց ցեղասպանության բանաձև, Թուրքիայի ազգային մեծ ժողովը (ԹԱՄԺ - TBMM) իր հերթին պետք է նրանց դատապարտող օրինագծեր ընդունի:

Ermenihaber.am