Թուրքիայի կառավարությունում կարող են փոփոխություններ լինել

Տարածաշրջան09:43, 21 Դեկտեմբեր 2013

Թուրքիայի կառավարությունում կարող են փոփոխություններ լինել

Թուրքիայում իշխող «Արդարություն և զարգացում» կուսակցության մամուլի խոսնակ Հուսեյին Չելիքը Թուրքիայի խորհրդարանում պատասխանել է լրագրողների հարցերին:

Չելիքը հայտնել է, որ Թուրքիայի կառավարության կազմում փոփոխություններ կարող են տեղի ունենալ հաջորդ շաբաթ: Նա, մատնանշելով վարչապետ Էրդողանի՝ մինչև հաջորդ շաբաթ հագեցված օրակարգը, համոզմունք է հայտնել, որ մինչև շաբաթվա վերջ կառավարությունում որևէ փոփոխություն չի լինի: Այս մասին տեղեկացնում է թուրքական «Հաբերա» լրատվական կայքը:

Տեղեկացնենք, որ կառավարությունում փոփոխությունների հարցը առաջ է եկել Թուրքիայում աղմկահարույց հակակոռուպցիոն օպերացիայից հետո, որը տեղի էր ունեցել դեկտեմբերի 17-ին:

Անկարայում և Ստամբուլում ոստիկանության կողմից իրականացված հակակոռուպցիոն խոշոր օպերացիայի ժամանակ ձերբակալվել էին նախարարների ու գործարարների որդիներ: Ավելի քան 5 տասնյակ ձերբակալվածների թվում են եղել Թուրքիայի ներքին գործերի նախարար Մուամմեր Գյուլերի, Էկոնոմիկայի նախարար Զաֆեր Չաղլայանի ու քաղաքաշինության նախարար Էրդողան Բայրաքթարի որդիները: