Անկարան թույլատրել է ՌԴ ռազմական ինքնաթիռներին իր օդային տարածքով անցնել Սիրիա

Տարածաշրջան08:07, 24 Դեկտեմբեր 2013

Անկարան թույլատրել է ՌԴ ռազմական ինքնաթիռներին իր օդային տարածքով անցնել Սիրիա

Թուրքական իշխանություններն արդեն թույլատրել են Ռուսաստանի Դաշնության (ՌԴ) ռազմական ինքնաթիռներին իրենց օդային տարածքը հատելով անցնել Սիրիա: Սիրիայում սկսված քաղաքացիական պատերազմի ամբողջ ընթացքում նման բան չէր թույլատրվում: Աննախադեպ այս թույլտվության մասին հայտնում է թուրքական «հաբերվաքթի» լրատվական կայքը` վկայակոչելով Ռուսաստանի պաշտպանության նախարարության աղբյուրները:

Համաձայն նշյալ տեղեկության` ռուսական բանակին պատկանող ԻԼ-76 տիպի ռազմական բեռնատար 10 ինքնաթիռ, օգտվելով Թուրքիայի օդային տարածքից, մտել են Սիրիայի Լազքիյե քաղաք: Նպատակը այդ երկրում առկա քիմիական զենքի ոչնչացման առաքելություն կատարելն է: Թեև այդ ժամանակ բախումներ են տեղի ունեցել Լազքիյեում, բայց ռուսական զինվորական անձնակազմը վնասներ չի կրել:

Հիշեցվում է, որ 2012 թվականի հոկտեմբերի 10-ին Անկարայի Էսենբողա օդանավակայանում հարկադիր վայրէջք էր կատարել Մոսկվայից Դամասկոս մեկնող սիրիական քաղաքացիական ինքնաթիռը և խուզարկվել: Ռուսական ինքնաթիռները Սիրիա էին մեկնում Թուրքիայի օդային սահմանների մեջ չմտնող ճանապարհով:

Ermenihaber.am