New York Times. «Սկանդալը մոտենում է Էրդողանին»

Տարածաշրջան12:38, 26 Դեկտեմբեր 2013

New York Times. «Սկանդալը մոտենում է Էրդողանին»

Այն բանից հետո, երբ Թուրքիայի քաղաքաշինության նախարարը, մեղադրելով երկրի վարչապետին, հրաժարական տվեց զբաղեցրած պաշտոնից, կոռուպցիոն սկանդալը մեկ քայլով մոտեցավ Ռեջեփ Թայիփ Էրդողանին: Քաղաքաշինության նախարարն ասել էր, որ վարչապետ Էրդողանը ևս պետք է հրաժարական տա: Նման տեսակետով է հանդես եկել հեղինակավոր «New York Times» պարբերականը: «Սկանդալը մոտենում է Էրդողանին» վերտառությամբ հրապարակման մեջ նշվում է, որ Թուրքիայի հանրությունը սկսել է հետաքրքրել` արդյո՞ք ականատես կլինեն վերջին տասնամյակում երկիրը կառավարող իսլամական արմատներով կառավարության անկմանը:

Հոդվածում ընդգծվում է այն միտքը, որ ՆԱՏՕ-ի, անդամ Թուրքիան ԱՄՆ-ի ու Եվրոպայի կողմից դիտվում էր որպես կայուն ուժ Մերձավոր Արևելքում: Թուրքիան էլ փորձում էր միջամտություն հանդես բերել Սիրիայի, Եգիպտոսի ու Իրանի հետ կապված հարցերում:

«Բայց այժմ վտանգվել է ոչ միայն Էրդողանի քաղաքական կյանքը, այլ նաև հարցականի տակ են հայտնվել Թուրքիայի տարածաշրջանային դերը և Արևմուտքի հետ հարաբերությունները»,- գրում է հեղինակավոր «New York Times»-ը: Նաև նշվում է, որ Էրդողանն այլ անհանգստություն ևս ունի. մտավախություն կա, որ ամռանը Գեզի զբոսայգուն առնչվող իրադարձություններից բռնկված հակակառավարական լայնամասշտաբ ցույցերը կարող են կրկնվել ներկառավարական այս ճգնաժամից, մանավանդ որ արդեն ցույցեր են տեղի ունենում «ամենուր կաշառակերություն է», «ամենուր ապօրինություն է» վանկարկումներով:

Հիշեցնենք, որ դեկտեմբերի 17-ին Ստամբուլում և Անկարայում ոստիկանական լայնամասշտաբ օպերացիա էր իրականացվել` ուղղված կաշառակերության ու կոռուպցիայի բացահայտմանը: Արդյունքում ձերբակալվեցին նախարարների ու անվանի գործարարների որդիներ: Կոռուպցիոն սկանդալի հետևանքով հրաժարական տվեցին բոլոր 3 նախարարներն էլ, որոնց որդիները ձերբակալվել էին: Վարչապետ Էրդողանը փոխել է կառավարության կազմը և, պաշտոնանկ անելով նախկիններին, նշանակել 10 նոր նախարարներ:

Ermenihaber.am