Թուրքիայի խորհրդարանում բռունցքներով հաշիվ են մաքրել

Քաղաքական08:18, 11 Հունվար 2014

Թուրքիայի խորհրդարանում բռունցքներով հաշիվ են մաքրել

Թուրքիայի խորհրդարանում տեղի է ունեցել բախում իշխանական «Արդարություն և զարգացում» (ԱԶԿ-AKP) և ընդդիմադիր «Ժողովրդահանրապետական» (ԺՀԿ-CHP) կուսակցությունների պատգամավորների միջև: «Դատավորների և դատախազների բարձրագույն խորհրդի» (ԴԴԲԽ) կազմում փոփոխություններ նախատեսող օրինագծի շուրջ ծավալված քննարկումների ժամանակ ԱԶԿ-ականների ու ԺՀԿ-ականների տարաձայնությունները թեժացել են` հասնելու ընդհուպ բռունցքների:

Ըստ թուրքական «Միլլիյեթ» պարբերականի` ընդդիմադիրներն առարկել են օրինագծի քննարկումը` պատճառաբանելով, թե «ԴԴԲԽ»-ի ներկայացուցիչները բացակայում են: Իշխանական պատգամավորներն էլ պատասխանել են, թե «ԴԴԲԽ»-ի նախագահը` Թուրքիայի արդարադատության նախարար Բեքիր Բոզդաղը ներկա է ու դա բավական է: Համաձայնության չգալով` պատգամավորները սկսել են հարվածել միմյանց: Ընդդիմադիր պատգամավոր Մուսլիմ Սարը արդարադատության նախարարին ասել է. «Դատվելու եք, դատարանի ճամփան ձեզ է սպասում», մյուս ընդդիմադիրները վանկարկել են «Ամեն տեղ կաշառակերություն է, ֆաշիզմից պրծում չկա»:

Ermenihaber.am