ERMENI HABER AJANSI

Միջազգային ասպարեզում Թուրքիայի կառավարության ու արտգործնախարարության  կողմից իրականացվելիք լոբբիստական գործունեությունը, դիվանագիտական և տնտեսական դիմակայությունը նպատակ ունի պատնեշել հայկական սփյուռքի գործողությունները: Այս մասին գրում է Թուրքական «Հաբեր 7» էլեկտրոնային լրատվականը: 

Հիշեցնենք, որ երեկ թուրք դեսպանների հետ կայացած հանդիպման ժամանակ վարչապետ Էրդողանն անդրադարձել էր 2015-ին: Ըստ Էրդողանի՝ հայկական սփյուռքը ցանկանալու է 1915 թվականի դեպքերը տեղափոխել քաղաքական դաշտ, ինչն իրենք չպետք է թույլ տան:

Նույն լրատվականի հաղորդմամբ՝ Էրդողանի խոսակցությունից հետո պարզ են դարձել մի շարք քայլեր, որոնք կատարվելու են կառավարության կողմից: Ցեղասպանության 100-ամյակի նախապատրաստությունները ներառում են բազմաթիվ կոնֆերանսներ, սիմպոզյումներ, գրքերի հրատարակումների և վավերագրական նյութերի հետ կապված աշխատանքներ: Աշխարհի բոլոր երկրներում հասարակական կարծիքի վրա ազդող տարբեր տեսակի միջոցառումներ են կազմակերպվելու:

Մշակվող ռազմավարության շրջանակներում Թուրքիայի պատմագիտական ընկերությունը աշխատում է «Թուրք-հայկական հարաբերությունների ժողովածու»-ի  վրա, որը նախատեսվում է ավարտել մինչև 2015 թվականը:

Հաղորդվում է նաև, որ 2014 թվականի ընթացքում կգումարվեն 14 տարբեր ժողովներ, որոնց նպատակը կլինի ծանոթացնել Հայոց ցեղասպանության վերաբերյալ թուրքական պաշտոնական թեզերին:

Ermenihaber.am