Քրդական կառույցի սկանդալային հայտարարության պարզաբանմամբ հանդես կգա անձամբ Օջալանը

Քաղաքական10:24, 16 Հունվար 2014

Քրդական կառույցի սկանդալային հայտարարության պարզաբանմամբ հանդես կգա անձամբ Օջալանը

Թուրքիայի ընդդիմադիր քրդական «Խաղաղություն և ժողովրդավարություն» (ԽԺԿ-BDP) կուսակցության համանախագահ Սելահաթթին Դեմիրթաշը խախտել է լռությունը` անդրադառնալով մեկ այլ քուրդ գործչի կողմից վերջերս արված սկանդալային հայտարարությանը:

Միջանկյալ հիշեցնենք, որ «Քրդական համայնքների միության» (ՔՀՄ-KCK) համանախագահ Բեսե Հոզաթը օրերս հայտարարել էր, թե Թուրքիայի ներսում կան զուգահեռ պետություններ, որոնց մաս են կազմում հայկական, հրեական ու հունական լոբբիները: Դա հարուցեց Թուրքիայի ազգային նշյալ փոքրամասնությունների վրդովմունքը, և հնչեցին բազմաթիվ դատապարտող կարծիքներ:

«Հյուրրիյեթ» պարբերականի տեղեկացմամբ` Դեմիրթաշը նշել է, որ Հոզաթի խոսքերն իրականում ուղղված են եղել միջազգային խառնակիչ ուժերին, բայց ստացվել է, որ թիրախում հայտնվել են Թուրքիայում բնակվող հայերը, հույները, հրեաները: Նա ափսոսանք է հայտնել, որ Հոզաթի հայտարարությունը թյուրընկալման տեղիք է տվել: Քրդերի առաջնորդ Աբդուլլահ Օջալանի հետ տեսակցած Դեմիթաշը պատմում է. «Օջալանն ասաց, որ Հոզաթի խոսքերը թյուրըմբռնման տեղիք են տվել: Օջալանը ասաց, որ ինքը նամակի միջոցով անձամբ հանդես կգա հայտարարությամբ»:

Ermenihaber.am