ERMENI HABER AJANSI

Թուրքիայի նախագահ Աբդուլլահ Գյուլը Իտալիա կատարելիք այցից առաջ հարցազրույց է տվել իտալական մի թերթի: «Սի էն էն թուրք» լրատվականը հայտնում է, որ Գյուլը իտակալան պարբերականի հետ զրույցում անդրադարձել է Թուրքիայի կոռուպցիոն սկանդալին, հետևանքներին, դավադրության տեսությանը, եվրաինտեգրմանը, երկրի տնտեսական և արտաքին քաղաքականություններին:

Ի պատասխան լրագրողի այն դիտարկմանը, թե 2013-ին Թուրքիան ցնցվեց Գեզի զբոսայգու հետ կապված հակակառավարական ցույցերից, Ստամբուլը զրկվեց օլիմպիական խաղերն իր տարածքում անցկացնելու հնարավորությունից, երկրում բռնկվեց կոռուպցիոն սկանդալ, Թուրքիայի նախագահն ասել է, որ 2013 թվականն իսկապես անհաջող եղավ թուրքական պետության համար:

«Բայց 2014-ին անելու ենք ամեն հնարավորը կրկին փայլելու համար»,- փորձել է հավաստիացնել Աբդուլլահ Գյուլը:

Վերջինիս հարց է ուղղվել այն մասին, թե գալիք նախագահական ընտրություններից հետո արդյո՞ք Թուրքիայում կրկնվելու է ռուսական սցենարը, երբ նախագահ Մեդվեդևը զբաղեցրեց վարչապետի, իսկ վարչապետ Պուտինը` նախագահի աթոռը: Գյուլն արձագանքել է, որ այդ մասին դեռ վաղ է խոսել, կգա ժամանակը, իր ընտանիքի հետ որոշում կկայացնի և կգործի ըստ այդմ: «Ընտանիք ասելով ես նկատի ունեմ ոչ միայն կնոջս ու զավաներիս, այլ նաև «Արդարություն և զարգացում կուսակցության»-ը »,- հավելյալ պարզաբանել է Թուրքիայի նախագահը:

Լրագրողը նաև հարցրել է. «Թուրքիայի եվրաանդամակցությունը դեռ իրատեսակա՞ն է»: Գյուլը նախ հիշեցրել է, որ Թուրքիան աշխարհի հզոր տնտեսություն ունեցող երկրների շարքում զբաղեցնում է 16-րդ տեղը` առանց ունենալու գազ կամ նավթ:

«Եվրոպայի ժողովրդավարական նպատակների իրականացումը, Եվրամիության գլխավոր սկզբունքներն էլ ներառյալ, ժողովրդի համար և վահան են, և ուղեցույց»:

Ermenihaber.am