Zaman. Ինչո՞ւ են քուրդ գործիչներն աջակցում Էրդողանի վարչակազմին

Տարածաշրջան07:30, 04 Փետրվար 2014

Zaman. Ինչո՞ւ են քուրդ գործիչներն աջակցում Էրդողանի վարչակազմին

Գեզիի ցույցերից հետո քրդերի վարած քաղաքականությունն ուշագրավ կերպով աջակցում է թուրքական իշխանութուններին: Թուրքիայում իշխող «Արդարություն և զարգացում» կուսակցության (ԱԶԿ-AKP) և քրդական «Խաղաղություն ու ժողովրդավարություն» (ԽԺԿ-BDP), «Քուրդիստանի բանվորական» (ՔԲԿ-PKK) կուսակցությունների միջև հետաքրքիր երկխոսություն է զարգանում: Նման դիտարկում է հայտնել թուրքական «Զաման» պարբերականի սյունակագիր Իհսան Դաղըն: Վերջինս հիշեցնում է «ՔԲԿ»-ի քաղաքական թևի` «Քրդական համայնքների միության» (ՔՀՄ-KCK) համանախագահ Բեսե Հոզաթի` հայերին, հույներին ու հրեաներին մեղադրող հայտարարությունը և հարց բարձրացնում` ինչու են քուրդ գործիչները վերջին շրջանում աջակցում ԱԶԿ-ին:

Առաջին հավանական վարկածը, որ առաջ է քաշում հոդվածագիրը, հետևյալն է. քրդական հարցի կարգավորման գործընթացը ցանկալի չէ, որ ընդհատվի: Իսկ չընդհատվելու համար հարկավոր է, որ իշխանության մեջ մնան ԱԶԿ-ականները, որոնք էլ քրդերի հետ սկսել են այդ գործընթացը: Ահա թե ինչու Գեզիի հակակառավարական ցույցերը, կոռուպցոին սկանդալը չի բխում քրդերի շահերից, քանի որ դրանք սպառնում են ԱԶԿ-ական իշխանություններին, իսկ վերջիններիս տապալման դեպքում ենթադրաբար կտապալվի նաև քրդական հարցի կարգավորման գործըթնացը:

Իհսան Դաղըն քրդերի ուշադրությունը հրավիրում է այն հանգամանքի վրա, թե ինչպես կարող է օրեցօր ավելի ավտորիտար դարձող Թուրքիան ապահովել քրդական հարցի ժողովրդավարական լուծումը: Երբ Գեզիի ցույցերը բռնի ուժով ճնշելուց հետո ավելի ավտորիտար դարձող Թուրքիան դեռ պարուրված էհետադիմական «դավադրության տեսություններով», ինչպե՞ս կարող է քրդերի համար ապահովել ազատություն ու բազմակարծություն: Քրդերի քաղաքական ռազմավարությունը տարօրինակ ու կասկածելի համարելով` հոդվածի հեղինակը այնուամենայնիվ հստակ ուղերձ է հղում.

«Ավտորիտար պետություն դարձող Թուրքիայի զոհերը լինելու են ոչ միայն թուրքերը, այլ նաև քրդերը»:

Ermenihaber.am