ERMENI HABER AJANSI

Գերմանիայում գտնվող Թուրքիայի վարչապետ Ռեջեփ Թայիփ Էրդողանը  «Եվրոպայի թուրքական կազմակերպությունների միության» կողմից կազմակերպված «Բեռլինյան հանդիպման» ժամանակ հանդես է եկել ելույթով: Ելույթում Էրդողանը մեսիջներ է ուղղել Ֆեթուլլահ Գյուլենին, ում վերագրում են դեկտեմբերի 17 «հակակոռուպցոիան օպերացիայի » կազմակերպումը:

Թուրքական «Միլլիյեթ» թերթի բնորոշմամբ իր այս ելույթով Էրդողանը մարտահրավեր է նետում Գյուլենին:
Էրդողանը մասնավորապես ասել է. «11 տարի շարունակ բազմաթիվ սադրանքների ենթարկվեցինք: Հեղաշրջման սցենարներ գրեցին, սակայն հաջողություն չունեցան: Փորձեցին մեր կուսակցությունը փակել, սակայն արդյունքի չհասան: Ցանկացան վնասել տնտեսությանըւ, նորից ոչ մի արդյունք: Այս պահին էլ ցանկանում են նույնը անել: Սկզբում Գեզիի դեպքերի ընթացքում փորձեցին այդ ամենը անել, բայց չստացվեց: Հիմա էլ դեկտեմբերի 17-ին, հեղաշրջան նախաձեռնությամբ որպես թիրախ ընտրեցին մեր ազգային արժեքները:

Իր երկիրը այլ երկրներում սևացնող մարդիկ արդյո՞ք կարող են հայրենասեր ու ազգասեր լինել:  Եթե անելու բան ունես, արի քո երկրում արա դա: Եթե ուժերդ ներում են արի արա»:

Նշենք, որ ԱՄՆ-ում  բնակվող Գյուլենի ստեղծած շարժումը Թուրքիայում և Թուրքիայից դուրս հիմնել է  բազմաթիվ դպրոցներ, համալսարաններ: Գյուլենի կրոնական համայնքին են պատկանում բազմաթիվ հիմնադրամներ, միություններ, լրատվամիջոցներ, հիվանդանոցներ, բիզնես կառույցներ և բանկեր: Գյուլենի շարժման անդամները կարևոր պաշտոններ են զբաղեցնում Թուրքիայի գրեթե բոլոր գերատեսչություններում:

 Գյուլենը  և նրա համայնքը մեղադրվում են «մեծ կաշառք» օպերացիան կազմակերպելու մեջ: Շատերի կարծիքով այդ  օպերացիան գյուլենականների  պատասխանն էր Էրդողանի «Արդարություն և զարգացում» կուսակցության՝ գյուլենական մասնավոր դպրոցները  փակելու նախաձեռնությանը։

Ermenihaber.am