ERMENI HABER AJANSI

Թուրքիան ծրագրում է մեկ ամսից շահագործել տիեզերք ուղարկվելիք TÜRKSAT-4A արբանյակը, շնորհիվ որի, երկրագնդի ցամաքի 50 տոկոս ծածկույթով և բնակչության 2/3-րդին արբանյակային կապ տրամադրելու հնարավորություն կտրվի: Բացի դրանից TÜRKSAT-4A-ն հոգալու է նաև թուրքական բանակի ռազմական կապի կարիքները:

Արբանյակային կապ տրամադրող «TÜRKSAT» ընկերության նախագահ Օզքան Դալբայը հայտնել է, որ մինչև 2023 թվականը Թուրքիան նախատեսում է ընդգրկվել աշխարհի 10 ամենախոշոր արբանյակային օպերատորների կազմում:

Ըստ թուրքական «Հաբեր3» լրատվական կայքի` նշյալ արբանյակը պետք է եռապատկի Թուրքիայի հեռահաղորդակցության հնարավորությունները: Արբանյակը պատրաստվել է Ճապոնիայում, այնուհետև տեղափոխվել Ղազախստան, որտեղի տիեզերակայանից էլ պետք է փետրվարի 14-ին արձակվի տիեզերք:

Հիշեցնենք, որ ավելի վաղ Չինաստանի Jiuquan տիեզերակայանից Göktürk-2 արբանյակի արձակումից հետո Թուրքիայի վարչապետ Ռեջեփ Թայիփ Էրդողանը հայտարարել էր, թե Թուրքիան արբանյակների արձակման համար մտադիր է կառուցել սեփական տիեզերակայանը: Մինչև այժմ աշխարհի միայն 25 երկիր է կարողացել արբանյակ ուղարկել տիեզերք, որոնցից մեկը Թուրքիան է: 

Ermenihaber.am