Թուրքիայի կառավարությունն արտաքին զիջումների գնով փորձում է պահել իշխանությունը

Քաղաքական08:43, 13 Փետրվար 2014

Թուրքիայի կառավարությունն արտաքին զիջումների գնով փորձում է պահել իշխանությունը

Նման տեսակետ արտահայտող հոդվածի հրապարակումով է հանդես եկել Օրհան Բուլութը: «Յենի չաղ» պարբերականում տպագրված «Էրդողանի միջոցով շանտաժ Թուրքիային» հոդվածում Բուլութը նշում է, որ իշխանությունները երկրի ղեկը իրենց ձեռքին պահելու համար դիմում են ամեն քայլի, մինչևանգամ արտաքին քաղաքական զիջումների: Արտաքին աշխարհի աջակցությունը ստանալու համար Թուրքիայի շահերից չբխող զիջումներ են կատարում: Բուլութը թվարկում է մի քանի օրինակ` ի հաստատումն վերը նշվածի:

Կիպրական հարցում Թուրքիան տեղի է տվել ամերիկյան ճնշումներին ու սեղանին դրել Անանի պլանը: Շուտով կանցկացվի հանրաքվե և եթե հաղթի «այո»-ն, ապա Հյուսիսային Կիպրոսի Թուրքական Հանրապետությունը կանցնի Հունաստանի և Եվրամիության գերիշխանության տակ:
Քրդական «Խաղաղություն և ժողովրդավարություն» կուսակցությունը (ԽԺԿ-BDP) նորից սկսել է բարձրաձայնել ընտրություններից հետո հայտարավելիք ինքնավարության մասին:
Հայերի տեղահանության (ցեղասպանության - EH) 100 ամյակի նախաշեմին Թուրքիայի արտգործնախարարն ասում է թե անընդունելի էին այդ տեղահանությունները:
Ամերկաբնակ հայերը Թուրքիայի քաղաքացիություն են ցանկանում ստանալ, Աբդուլլահ Գյուլն էլ ըստ էության առաջարկել է 20 հազար դոլարով քաղաքացիություն վաճառել:

Հոդվածագիրը ուշադրություն է հրավիրում վարչապետ Էրդողանի գլխավորած կառավարության գործունեության հեռանկարի վրա: Նախ մեջբերում է իշխանամետ դիրքորոշում ունեցող վերլուծաբան Ջեմիլ Էրթեմի տողերն այն մասին, որ Էրդողանը հայկական, կիպրական և մերձավորարևելյան խնդիրներում քայլեր է կատարելու, ինչի շնորհիվ շարունակվելու է ԱՄՆ-ի և Եվրամիության աջակցությունը: Նման մոտեցումը Բուլութը համարում է գործարար աշխարհին սոսկ ներդրումների ահամր գայթակղելու հնարք, ոչ ավելին:

«Լավ, իսկ հնարավո՞ր է համոզել ժողովրդին: Երաշխիք կա՞, որ ընտրությունների արդյունքում «ԱԶԿ»-ն չի դառնա փոքր կշիռ ունեցող կուսակցություն: Թուրգութ Օզալն էլ էր ժամանակին շատ ուժեղ, բայց հիմա որտեղ է ANAP»-ը»:

Նշենք, որ «ANAP»-ը Թուրքիայի Հանրապետության 8-րդ նախագահ Թուրգութ Օզալի հիմնադրած «Մայր հայրենիք» կուսակցությունն է:

«Եթե Թուրքիան կարողանա ոտքի վրա մնալ, ապա էրդողանները կկանգնեն դատարանի առաջ»,- եզրափակել է հոդվածի հեղինակը:

Ermenihaber.am