Թուրք ընդդիմադիրները Ստամբուլում բողոքի ակցիա են անցկացնում. պահանջում են Էրդողանի հրաժարականը

Քաղաքական13:15, 26 Փետրվար 2014

Թուրք ընդդիմադիրները Ստամբուլում բողոքի ակցիա են անցկացնում. պահանջում են Էրդողանի հրաժարականը

Թուրքիայի վարչապետ Ռեջեփ Թայիփ Էրդողանի որդու Բիլալ Էրդողանի հետ ունեցած հեռախոսազրույցի ձայնագրության հրապարակումից հետո այսօր փողոց են դուրս եկել ընդդիմադիրները: Հայտնում է թուրքական «Վաթան» պարբերականը:

Թուրքիայի ընդդիմադիր «Ժողովրդահանրապետական կուսակցության» (CHP-ԺՀԿ) հետևորդները Ստամբուլի Թաքսիմ հրապարակում բողոքի ակցիա են այս պահին անցկացնում : ԺՀԿ-ի Ստամբուլի գրասենյակի նախագահ Օղուզ Քաան Սալըջըն ելույթում դիմելով Էրդողանին` ասել է. « Եթե չապացուցես, որ այդ ձայնագրությունները կեղծ են, ստիպված կլինես հրաժարական տալ»:

Ակցիայի մասնակիցներիը իրենց հետ Թաքսիմ են բերել թղթե դոլարներ, որն ելույթներից հետո օդ են շպրտել: Ոստիկանությունը խիստ հսկողության տակ է պահում Թաքսիմ հրապարակը:

Նշենք, որ փետրվարի 24-ին, երեկոյան թուրքական մամուլում հայտնվել էր վարչապետ Ռեջեփ Թայիփ Էրդողանի և որդու՝ Բիլալ Էրդողանի գաղտնալսված հեռախոսազրույցների ձայնագրությունները, որոնք տեղի են ունեցել դեկտեմբերի 17-ին՝ Թուրքիայում տեղի ունեցած կոռուպցիոն սկանդալի օրը: Հեռախոսազրույցում Էրդողանը որդուն տեղեկացնում է, որ խուզարկություններ են տեղի ունենում և հրահանգներ է տվել որդուն` տանից փողերը հանելու ու զրոյացնելու վերաբերյալ:

Ermenihaber.am