Վանում տեղի է ունեցել Թուրքիայի, Ադրբեջանի ու Իրանի արտգործնախարարների հանդիպումը

Տարածաշրջան13:19, 14 Մարտ 2014

Վանում տեղի է ունեցել Թուրքիայի, Ադրբեջանի ու Իրանի արտգործնախարարների հանդիպումը

Վանում տեղի է ունեցել Թուրքիայի արտգործնախարար Ահմեթ Դավութօղլուի և ադրբեջանցի ու իրանցի պաշտոնակիցներ Էլմար Մամեդյարովի ու Մոհամեդ Ջավադ Զարիֆի եռակողմ հանդիպումը:

Թուրքական«Հաբերլեր» էլեկտրոնային լրատվականի հաղորդմամբ՝ հանդիպման ավարտին 3 նախարարները հանդիպել են լրատվամիջոցների ներկայացուցիչների հետ:

Առաջինը ելույթով հանդես եկած Դավութօղլուն նշել է, որ հանդիպմանը քննարկել են 2014-2016թթ. ընդհանուր համագործակցության ծրագիրը, որն ,ըստ թուրք նախարարի, նախատեսում է առկա համագործակցության էլ ավելի խորացում: Դավութօղլուն նշել է նաև, որ Կովկասում ու Մերձավոր Արևելքում կան չլուծված խնդիրներ և պետք է տարածքային ամբողջականության ու փոխադարձ հարգանքի հիման վրա տարածաշրջանում կայունություն ապահովվի:

Ադրբեջանի արտգործնախարար Էլմար Մամեդյարովն էլ իր ելույթում խոսել է «ադրբեջանական» տարածքներից հայկական զինուժի դուրսբերման մասին, որն, ըստ նրա, կթուլացնի լարվածությունը տարածաշրջանում:

Իրանցի նախարարը ևս խոսել է եռակողմ համագործակցության ծրագրի մասին՝ ինչպես նաև անդրադարձ կատարել ընդհանուր մուսուլմանական ժառանգությանը:

Հարցուպատասխանի ժամանակ Դավութօղլուն պատասխանել է նաև Ղրիմում տիրող իրավիճակի մասին իրեն ուղղված հարցին:

Թուրք նախարարը հայտնել է, որ այդ հարցում իրենք ակտիվ դիվանագիտություն են բանեցնում: Դավութօղլուն հայտարարել է նաև, որ իրենք կողմ են Ուկրաինայի տարածքային ամբողջականության պահպանմանը և հույս հայտնել, որ հարցի լուծումը կապահովվի բոլոր կողմերի խաղաղ ջանքերի միջոցով:

Ermeihaber.am