Պաշտոնից հեռացվել է Ադրբեջանի ամենաբարձրաստիճան գյուլենականը` Էլնուր Ասլանովը

Քաղաքական07:47, 18 Մարտ 2014

Պաշտոնից հեռացվել է Ադրբեջանի ամենաբարձրաստիճան գյուլենականը` Էլնուր Ասլանովը

Ադրբեջանի նախագահ Իլհամ Ալիևի հրամանագրով պաշտոնից ազատվել է նախագահի աշխատակազմի քաղաքական վերլուծության և տեղեկատվության բաժնի ղեկավար Էլնուր Ասլանովը: Այս մասին հայտնող թուրքական «Յենի Շաֆաք» պարբերականը նշում է, որ Ասլանովը համարվում է գյուլենական համայնքի ամենաբարձրաստիճան պաշտոնյան Ադրբեջանում: Նույն աղբյուրի համաձայն` Թուրքիայում առկա «զուգահեռ պետություն»-ը, որի շարժիչ ուժը համարվում են գյուլենականները, ներթափանցել է Ադրբեջանի պետական կառույցներ և կապեր հաստատել պետական գործիչների ու պատգամավորների հետ:

Տեղեկություններ կան այն մասին, որ Ստամբուլում Ադրբեջանի հյուպատոս Հասան Զեյնալովի միջոցով Թուրքիայի պաշտոնական շրջանակները կազմել և Ադրբեջանի կառավարությունն են ներկայացրել Իլհամ Ալիևի աշխատակազմում և կառավարությում առկա այն բարձրաստիճան անձանց ցուցակը, ովքեր կապեր ունեն գյուլենականների կամ նուրսիստների հետ: Այդ ցուցակում տեղ են գտել Ադրբեջանի պետական նավթային ընկերության (SOCAR) Խալիգ Մամեդովի, կրոնական կառույցների հետ աշխատանքի գծով պետկոմիտեի նախագահ Էլշադ Իսքենդերովի, տեղակալ Գյունդուզ Իսմայիլովի, երիտասարդության և սպորտի հարցերով փոխնախարար Ինթիգամ Բաբաևի, Պատգամավորներ Ջեյհուն Օսմանլըի, Գանիրա Փաշաևայի, երիտասարդական հիմնադրամի նախագահ Ֆարհադ Հաջիևի անունները:

Նշենք, որ գյուլենական (նուրսիստների) շարժման առաջնորդն ամերիկաբնակ թուրք միլիադրատեր Ֆեթուլլահ Գյուլենն է, որը 1999-ից հալածանքների պատճառով հեռացել է Թուրքիայից: Մինչև վերջերս գյուլենական համայնքը համարվում էր Թուրքիայում իշխող «Արդարություն և զարգացում» կուսակցության (ԱԶԿ-AKP) քաղաքական հենարանը: Այժմ Գյուլեն-Էրդողան հակասությունը հետզհետև Թուրքիային հանգեցրել է ներքաղաքական, ներիշխանական խոր ճգնաժամի:

Ermenihaber.am