Թուրքիան պատրաստակամություն է հայտնել ապաստան տալ Քեսաբի հայությանը

Քաղաքական14:15, 26 Մարտ 2014

Թուրքիան պատրաստակամություն է հայտնել ապաստան տալ Քեսաբի հայությանը

Թուրքիայի արտաքին գործերի նախարարությունը (ԱԳՆ) գրավոր հայտարարություն է տարածել սահմանամերձ սիրիական Քեսաբ և Լաթաքիա բնակավայրերում վերջին օրերին տեղի ունեցող իրադարձությունների վերաբերյալ:

Թուրքիայի ԱԳՆ-ի պաշտոնական կայքում հրապարակված հայտարարության մեջ հերքվում են այն բոլոր լուրերը, համաձայն որոնց, Թուրքիան աջակցություն է ցույց տալիս Սիրիայի հակակառավարական ուժերին և նրանց թույլ է տալիս իր տարածքից ազատորեն ներխուժել սիրիական սահմանամերձ բնակավայրեր:

Թուրքայի արտաքին քաղաքական գերատեսչությունն անընդունելի և դատապարտելի է համարել Քեսաբում տեղի ունեցող իրադարձություններն անցյալի ողբերգական դեպքերի հետ համեմատելու փորձերը` գնահատելով դա որպես կոնֆլիկտ հետապնդող քաղաքական քարոզչություն:

Հայտարարության մեջ Սիրիայի ներկայիս իշխանություններին վերագրվում է բռնության և ագրեսիայի քաղաքականություն, ինչի հետևանքով բազմաթիվ սիրիացիներ հարկադրված են լինում ներգաղթյալի կարգավիճակով ապաստան գտնել Թուրքիայում: Նշվում է, որ այժմ շուրջ 800 հազար սիրիացի փախստականներ ապաստան են ստացել Թուրքիայի տարածքում:

Իսկ Քեսաբի հայության վերաբերյալ մասնավորապես ասվում է, որ Թուրքիան, ելենոլվ մարդասիրությունից և խղճի պատասխանատվությունից, պատրաստ է ապաստան տալու Քեսաբի հայերին:

«Ինչպես մյուս սիրիացիների, այնպես էլ սիրիահայերի դեպքում նրանց կարիքները հոգալու համար անհրաժեշտ քայլեր կձեռնարկվեն»,- ասված է հայտարարության մեջ:

Ermenihaber.am