Դավութօղլուն անդրադարձել է թուրքական զինուժի կործանած սիրիական ինքնաթիռի թեմային

Տարածաշրջան12:44, 27 Մարտ 2014

Դավութօղլուն անդրադարձել է թուրքական զինուժի կործանած սիրիական ինքնաթիռի թեմային

Նախընտրական քարոզարշավի շրջանակներում կազմակերպված հանրահավաքի ժամանակ ունեցած իր ելույթում Թուրքիայի արտաքին գործերի նախարար Ահմեթ Դավութօղլուն անդրադարձել է Թուրքիայի զինված ուժերի կողմից խփված սիրիական ռազմական ինքնաթիռի թեմային:

Դավութօղլուի խոսքերով թուրք օդաչուները պարտավոր էին հարված հասցնել Սիրիայի զինված ուժերին պատկանող օդանավին, քանի որ այն խախտել էր թուրքական սահմանը: Թուրքական «Անադոլու» լրատվական գործակալության հաղորդմամբ՝ թուրք նախարարը մասնավորապես ասել է. «3 օր առաջ Սիրիայի ռեժիմի ինքնաթիռները խախտել են մեր սահմանը, իսկ մեր օդաչուներն անհրաժեշտ դաս են տվել: Որևէ ուժ մեր հայրենիքի սահմանը ոչ օդից, ոչ ցամաքից, ոչ էլ ծովից մի թիզ անգամ չի կարող խախտել:

Սակայն տեսնում եմ, որ որոշ լրատվամիջոցներ ասում են, թե դա ընտրությունների համար ենք արել: Մենք ինչպե՞ս կարող էինք սիրիական ինքնաթիռին ուղղորդել խախտելու մեր սահմանը, որպեսզի ընտրությունների համար դիվիդենտներ շահեինք: Ինչու՞ մենք պետք է սիրիական ինքնաթիռի կողմից մեր սահմանը խախտելը անպատասխան թողնեինք»:

Ermenihaber.am