Թուրքիայի ՏԻՄ ընտրությունների նախնական արդյունքները

Տարածաշրջան07:07, 31 Մարտ 2014

Թուրքիայի ՏԻՄ ընտրությունների նախնական արդյունքները

Բազմաթիվ բախումներով ու անկարգություններով նախօրեին Թուրքիայում ընթացած տեղական ինքնակառավարման մարմինների (ՏԻՄ) ընտրություններն ուղեկցվել էին սպանություններով ու խմբակային բախումներով: Թուրքական «Ջիհան» լրատվական գործակալության բնորոշմամբ` ՏԻՄ ընտրություններն անցկացվել են բավականին վիճահարույց պայմաններում: Այնուամենայնիվ հրապարակվել են երկրի 81 նահանգից 74-ում ամփոփված նախնական արդյունքները:

Ըստ այդմ` վարչապետ Ռեջեփ Թայիփ Էրդողանի գլխավորած «Արդարություն և զարգացում» կուսակցությունը (ԱԶԿ) հաղթանակ է տարել 45 նահանգում: Գլխավոր ընդդիմադիր «Ժողովրդահանրապետական կուսակցության» (ԺՀԿ) թեկնածուները հաղթել են 12 նահանգում: Քրդական «Խաղաղություն և ժողովրդավարություն» կուսակցությունը (ԽԺԿ) հաջողության է հասել 9, իսկ ընդդիմադիր «Ազգայնական շարժում» կուսակցությունը (ԱՇԿ)` 7 նահանգների քաղաքապետերի ընտրություններում:

«ԽԺԿ»-ի աջակցությունը վայելող անկախ թեկնածու Ահմեթ Թուրքն էլ հաղթել է իր մրցակիցներին Մարդինի քաղաքապետի ընտրություններում: Յայլովայում իշխանությունների առաջադրած թեկնածուն ընդդիմադիր մրցակիցներին հաղթել է ընդամենը 1 ձայնի առավելությամբ:

Մայրաքաղաք Անկարայում և Ստամբուլում Էրդողանի ղեկավարած կուսակցության թեկնածուները ստացել են ձայների մեծամասնությունը:

Ermenihaber.am