Հետընտրական Թուրքիա. սպանվել է քաղաքապետի թեկնածու

Տարածաշրջան14:14, 31 Մարտ 2014

Հետընտրական Թուրքիա. սպանվել է քաղաքապետի թեկնածու

Այսօր 14:20-ի սահմաններում իր տան դիմաց սպանվել է Թուրքիայի հարավ-արևելյան Թիլոյի քաղաքապետի թեկնածու, թուրքական «Սաադեթ» (բարօրություն) կուսակցությունը ներկայացնող 56-ամյա Բեհմեն Այդընը:

Բեհմեն Այդընը սպանվել է տանից դուրս գալու պահին մեքենայից արձակված հրազենային կրակից: Կրակահերթի հետևանքով ևս 5 հոգի վիրավորվել է: Այս մասին տեղեկացնող «Ջիհան» լրատվական գործակալությունը հայտնում է, որ կիրակի օրը անցկացված տեղական ինքնակառավարման մարմինների (ՏԻՄ) ընտրությունների ժամանակ իշխող «Արդարություն և զարգացում կուսակցության» և «Սաադեթ» կուսակցության թեկնածուների միջև կռիվ էր բռնկվել, ինչի հետևանքով 4 հոգի վիրավորվել էր:
«Սաադեթ» (բարօրություն) կուսակցությունը ստացել է ընդրողների ձայների 2,8 տոկոսը (1 մլն 207.085 ձայն):

Հիշեցնենք, որ երեկ տեղի ունեցած ՏԻՄ ընտրությունները ընթացել են բախումներով ու անկարգություններով:

ոստիկանությունում արդեն ստացվել են 8 զոհի և 35 վիրավորի մասին հաղորդագրություններ: Վիրավորների մեջ կան ինչպես քաղաքացիներ, այնպես էլ ոստիկաններ: Օրինապահ մարմիններն արդեն ձերբակալել են շուրջ մեկ տասնյակ անձանց:

Սպանությունները տեղի են ունեցել Հաթայ նահանգի Գյոլբաշը և Շանլըուրֆա նահանգի Յուվաջըք գյուղերի համայնքապետերի ընտրությունների ժամանակ: Դիարբեքիրի Սիլվան շրջանում խմբակային բախումներ են տեղի ունեցել իշխող «Արդարություն և զարգացում» կուսակցության և քրդական «Խաղաղություն և ժողովրդավարություն» կուսակցության կողմնակիցների միջև: Վեճին միջամտած ոստիկաններից երկուսը վիրավորվել են:

Ermenihaber.am