Radikal. Գյուլն ու Էրդողանը հանդես չեն գա որպես մրցակիցներ նախագահական ընտրություններում

Քաղաքական09:57, 15 Ապրիլ 2014

Radikal. Գյուլն ու Էրդողանը հանդես չեն գա որպես մրցակիցներ նախագահական ընտրություններում

Ո՞վ է լինելու Թուրքիայում իշխող «Արդարություն և զարգացում» կուսակցության (ԱԶԿ-AKP) թեկնածուն առաջիկա նախագահական ընտրություններում, ներկայիս վարչապետ Ռեջեփ Թայիփ Էրդողանը, թե նախագահ Աբդուլլահ Գյուլը: Այս հարցադրման հետքերով գնացած թուրքական «Ռադիքալ» պարբերականի վերլուծաբան Էյուփ Ջանը նշում է, որ պատասխանը հետաքրքրում է ոչ միայն Թուրքիային, այլ նաև միջազգային մի շարք շրջանակների: Ըստ իի տիրապետած տեղեկության` Ջանը հայտնում է այն հնարավոր սցենարը, որը կարելի է սպասել 2014-ի ամռանը Թուրքիայում:

Ըստ նրա` անցյալ շաբաթ նախագահական նստավայրում հանդիպել են Գյուլն ու Էրդողանը և որոշակի հստակեցում մտցրել իրենց առաջիկա անելիքներում: Նրանք, ովքեր սպասում են, թե նախագահական ընտրություններում Գյուլն ու Էրդողանը հանդես են գալու մրցակից թեկնածուներ, պետք է հուսախաբվեն, քանի որ կառաջադրվի նրանցից միայն մեկը` Էրդողանը, իսկ Գյուլը կաջակցի: Ամենաուշը մայիս ամսին այդ մասին պաշտոնապես կիրազեկվի Թուրքիայի հանրությունը:

Հեղինակը հերքում է բոլոր այն խոսակցությունները, թե իբր Գյուլը մտադիր է հեռանալ քաղաքականությունից և գրասենյակային աշխատանքի անցնել ՄԱԿ-ի կամ ՆԱՏՕ-ի որևէ հաստատությունում: Էրդողան հրապարակավ հայտարարել է, որ Գյուլը շարունակելու է մնալ քաղաքականության մեջ ու զբաղվել դրանով:

«Այնուամենայնիվ, մինչև նախագահական ընտրությունները դեռ 4 ամիս կա, իսկ քաղաքականության մեջ նույնիսկ մեկ օրը չափազանց երկար ժամանակ է»,- եզրափակում է հոդվածագիրը:

Ermenihaber.am