Թուրքիայի ԱԳՆ-ում գաղտնալսումն իրականացրել է գերատեսչության աշխատակիցը

Տարածաշրջան11:24, 17 Ապրիլ 2014

Թուրքիայի ԱԳՆ-ում գաղտնալսումն իրականացրել է գերատեսչության աշխատակիցը

Բացահայտվել է Թուրքիայի արտգործնախարարությունում Սիրիա ներխուժման ծրագրի քննարկման գաղտնալսումն իրականացրած անձի ինքնությունը: Թուրքիայի հետախուզության ծառայության (MİT) հետաքննության արդյունքում պարզվել էր, որ գաղտնալսումն իրականացվել է քաղաքային հեռախոսի մեջ տեղադրված գաղտնալսող սարքի միջոցով: Պարզվել է, որ սարքը հեռախոսի մեջ տեղադրել էին ժողովի անցկացման մասին հայտնի դառնալուց անմիջապես հետո, իսկ ժողովի ավարտից հետո այն նորից հանել էին:

Ըստ թուրքական «Սաբահ» թերթի՝ գաղտնալսող սարքը տեղադրող անձը Թուրքիայի արտգործնախարարության աշխատակից է: Նշվում է, որ վերջինս ուղղորդվել է «զուգահեռ կառույցի» կողմից (թուրքական մամուլում զուգահեռ կառույց է անվանվում գյուլենական համայնքը - խմբ.): Հետաքննությունը դեռևս չի ավարտվել: Այժմ քննության են առնվում բոլոր այն անձիք, որոնք կապ ունեն տվյալ աշխատակցի հետ:

Հիշեցնենք, որ տեղական ինքնակառավարման ընտրություններից առաջ համացանցում էր հայտնվել Թուրքիայի արտագին գործերի նախարար Ահմեթ Դավութօղլուի, փոխնախարար Ֆերիդուն Սինիրօղլուի, ազգային հետախուզության ծառայության պետ Հաքան Ֆիդանի և ԶՈՒ գլխավոր շտաբի պետի տեղակալ Յազար Գյուլերի՝ Սիրիա ներխուժման պլանի գաղտնի քննարկման ձայնագրությունը:

Ermenihaber.am