Թուրքիայի փոխվարչապետը հայտարարել է, որ Անկարան սպասում է Երևանի պատասխան քայլին

Քաղաքական07:59, 01 Մայիս 2014

Թուրքիայի փոխվարչապետը հայտարարել է, որ Անկարան սպասում է Երևանի պատասխան քայլին

Թուրքիայի փոխվարչապետ Բեշիր Աթալայը Վաշինգտոնում մասնակցել է “Insight Turkey” անգլալեզու վերլուծական հանդեսի կազմակերպված տարեկան համաժողովին ու հանդես եկել ելույթով: Ի թիվս այլ թեմաների` Աթալայն անդրադարձել է Հայաստանի հետ կապված հարցերին ու մասնավորապես վարչապետ Էրդողանի հղած ցավակցական ուղերձին:

Ինչպես հայտնում է թուրքական «Իհլաս» լրատվական գործակալությունը, փոխվարչապետ Աթալայը առաջընթաց քայլ է բնորոշել Էրդողանի` 1915-ի վերաբերյալ արած գրավոր հայտարարությունը:

«Մենք պատմությունն ավելի լայնորեն քննելու հայտարարություն ենք արել: Հիմա մենք ԱՄՆ-ի, միջազգային հանրության և իհարկե Հայաստանի ու սփյուռքահայության կողմից արձագանքող, գնահատող և խնդիրների լուծմանն ուղղված հայտարարությունների ու քայլերի ենք սպասում: Դա շատ կարևոր ենք համարում: Պետք է ասեմ, որ այդ ուղղությամբ մեր կատարելիք քայլերը շարունակական են լինելու»,- ասել է Թուրքիայի փոխվարչապետը:

Նշենք, որ «Insight Turkey»-ը լույս է տեսնում Անկարայում տարեկան 4 անգամ` սկսյալ 1999 թվականից: Պարբերականը քննարկում է հարցերի լայն շրջանակ, որոնք առնչվում են Թուրքիայի ներքին և արտաքին քաղաքականությանը, ինչպես նաև Թուրքիայի հարակից շրջաններին: