Թուրքիայի խորհրդարանում քննարկվում է նախարարների կաշառակերության ուսումնասիրման հանձնաժողով ստեղծելու հարցը

Տարածաշրջան14:08, 05 Մայիս 2014

Թուրքիայի խորհրդարանում քննարկվում է նախարարների կաշառակերության ուսումնասիրման հանձնաժողով ստեղծելու հարցը

Թուրքիայի Ազգային մեծ ժողովում քննարկման է դրվել հանձնաժողով ստեղծելու հարցը, որը պետք է ուսումնասիրի նախկին թուրք նախարարների՝ «կոռուպցիոն սկանդալի» շրջանակում կաշառքի, դրամաշորթության կամ պաշտոնեական դիրքի չարաշահման հետ կապ ունենալ-չունենալու հարցը: Ստեղծվելիք հանձնաժողովի աշխատանքների շրջանակների մեջ են ընդգրկվելու նախկին նախարարներ Էգեմեն Բաղըշի, Զաֆեր Չաղլայանի, Էրդողան Բայրաքթարի և Մուամմեր Գյուլերի գործերը: Մեջլիսի լիագումար նիստը չի հեռարձակվել խորհրդարանի հաղորդումները ցուցադրող հեռուստաալիքով, ինչը հարուցել է ընդդիմադիր խմբակցությունների բողոքը:

Թուրքիայի ընդդիմադիր «Ժողովրդահանրապետական» կուսակցության (ԺՀԿ) խորհրդարանական խմբակցության անդամ Մելդա Օնուրը բողոքել է միայն ինտերնետային հեռարձակման դեմ՝ պահանջելով նաև հեռուստատեսային հեռարձակում: Այս թեմայով հակասական տեսակետների բախումը մեջլիսում իշխող «Արդարություն և զարգացում» կուսակցության և ընդդիմադիր կուսակցությունների պատգամվորների միջև վիճաբանության առիթ է հանդիսացել: Թուրքական «Դողան» լրատվական գործակալության հաղորդմամբ՝ այս անգամ հաջողվել է խուսափել բռունցքներից:

ԺՀԿ խմբակցության պատգամավոր Օնուրը, բողոքով չբավարարվելով, իր անձնական պլանշետով նկարահանում է նիստը և ինտերնետային կայքի միջոցով ուղիղ հեռարձակում է կազմակերպում:

Ermenihaber.am