Թուրքիայի խորհրդարանում սպասվում են խմբակային հրաժարականներ

Տարածաշրջան13:21, 19 Մայիս 2014

Թուրքիայի խորհրդարանում սպասվում են խմբակային հրաժարականներ

Թուրքիայի գլխավոր ընդդիմադիր ուժը` քեմալական գաղափարախոսություն դավանող «Ժողովրդահանրապետական կուսակցություն»-ում (ԺՀԿ - CHP) պատգամավորները քննարկում են խմբակային հրաժարական տալու հարցը:

Այդ մասին տեղեկացնող թուրքական «Միլլիյեթ» պարբերականը հայտնում է, որ ժողովրդահանրապետական պատգամավոր Սաբահաթ Աքքիրազն ասել է, որ ինքն արդեն կուսակցության ղեկավար Քեմալ Քըլըչդարօղլուին ներկայացրել է մանդատից հրաժարվելու դիմումը և կոչ արել, որ ժհկ-ական բոլոր պատգամավորները հրաժարվեն մանդատներից: Քըլըչդարօղլուն բացասաբար չի վերաբերվել այդ կոչին ու հարցը դեռ քննարկման օրակարգում է:

Աքքիրազը նման քայլը բացատրել է որպես բողոքի նշան կառավարության այն մոտեցմանը, որ ցույց է տալիս տեղի ունեցած ածխահանքի ողբերգական վթարի նկատմամբ: Ընդդիմադիր պատգամավորը մասնավորապես ասել է. «Ի հակառակ պատասխանատվությունն իր վրայից գցելու կառավարության ջանեքերին` մենք Սոմայի զոհերի կողքին լինելու համար մանդատների կարիքը չունենք»:

Հիշեցնենք, որ մայիսի 13-ին Թուրքիայի Մանիսա նահանգի Սոմա ավանի ածխահանքում խոշոր վթար էր տեղի ունեցել, ինչի հետևանքով զոհվել էր 301 հանքափոր, վիրավերովել 486-ը:

Ermenihaber.am