Թուրքիայում ածխահանքի զոհերի թիվը կեղծվե՞լ է

Տարածաշրջան08:58, 21 Մայիս 2014

Թուրքիայում ածխահանքի զոհերի թիվը կեղծվե՞լ է

Թուրքիայի Մանիսա նահանգի Սոմա ավանի ածխահանքում մայիսի 13-ին տեղի ունեցած խոշոր վթարի հետևանքով հայտնի դարձած զոհերի թիվը կասկածներ է հարուցել: Պաշտոնական տվյալների համաձայն` վթարին զոհ են գնացել 301 հանքափոր, իսկ 486-ը` ստացել տարբեր աստիճանի մարմնական վնասվածքներ:

Թուրքական «Ջումհուրիյեթ» պարբերականը, վկայակոչելով Թուրքիայի աղետների և արտակարգ իրավիճակների կառավարման վարչության կողմից պաշտոնապես հրապարակած զոհերի անվանացանկում տեղ գտած անճշտությունը, կասկած է հայտնում զոհերի իրական թիվը գաղտնի պահելու վերաբերյալ:

Ցուցակում զոհերից մեկի անվան դիմաց կա նաև «722» նշումը, ինչը և կասկածներ է առաջացրել, թե արդյոք պաշտոնական թվերը չեն թաքցնում իրականությունը: Զոհերի անունների հետ միասին նշված են նաև համարակալման կոդեր, որոնց նպատակը թվերով միջոցով դիակների ինքնության շփոթը կանխելն է: Եվ ահա 301-ի ընդհանուր պաշտոնական թվի շրջանակներում համարակալված զոհերից մեկի`Բայրամ Ալի Դաղլըի անվան դիմաց նշված է «722», որն էլ հենց տարակուսանք է առաջացրել: Առայժմ պաշտոնական ոչ մի պարզաբանում չկա:

Ermenihaber.am