Թուրքիայում բողոքի ձայն են բարձրացնում հանքափորները

Տարածաշրջան12:22, 26 Մայիս 2014

Թուրքիայում բողոքի ձայն են բարձրացնում հանքափորները

Թուրքիայի Սոմա ածխահանքի վթարից հետո սկիզբ առած համատարած բողոքն ու դժգոհությունն էլ ավելի է թեժացել: Սոմա շրջանի հանքափորները զանգվածային ակցիաներ են անցկացրել` պահանջելով աշխտանքային պայմանների բարելավում և անվտանգության նորմերի պահպանում` ըստ արժանվույն:

Թուրքական «Գազեթեա24» լրատվական կայքը տեղեկացնում է, որ Սոմա շրջանում հանքահորերի աշխատակիցները ոտքի են ելել` պահանջելու Թուրքիայի հանքագործական արհմիության ղեկավարության հրաժարականը: Արհմիության Էգեյան մասնաճյուղի ղեկավար Թամեր Քյուչուքգենջայը հրաժարական է տվել այն բանից հետո, երբ հանքափորները բողոքի քայլերթ են իրականացրել դեպի արհմիության գրասենյակ: Քյուչուքգենջայից հետո հրաժարական է տվել նաև 5 հոգիանոց գործադիր խորհուրդը, բայց ցուցարարներին դա չի բավարարել:

Բողոքի ակցիայի ընթացքում ընդհարումներ են եղել ցուցարարների ու ոստիկանների միջև: Մեկ ոստիկան վիրավորվել է: Սոմայում իրավիճակը շարունակում է մնալ լարված:

Հիշեցնենք, որ մայիսի 13-ին տեղի ունեցած հանքավթարին, ըստ պաշտոնական տվյալների, զոհ են գնացել 301 հանքափոր, իսկ 486-ը` վիրավորվել:

Ermenihaber.am