Դավութօղլուն ներկա պայմաններում բացառել է Հայաստանի հետ որևէ փաստաթղթի ստորագրումը

Քաղաքական09:09, 29 Մայիս 2014

Դավութօղլուն ներկա պայմաններում բացառել է Հայաստանի հետ որևէ փաստաթղթի ստորագրումը

Թուրքիայի արտաքին գործերի նախարար Ահմեթ Դավութօղլուն անդրադարձել է Հայաստանի Հանրապետության հետ որևէ պայմանագրային փաստաթուղթ ստորագրելու թեմային: Պատասխանելով ընդդիմադիր «Ժողովրդահանրապետական կուսակցության» (ԺՀԿ - CHP) փոխնախագահ Սեզգին Թանրըքուլի գրավոր հարցին` Դավութօղլուն հստակ ասել է, որ ներկա պայմաններում Հայաստանի հետ որևէ փաստաթուղթ, այդ թվում և էներգետիկ բնույթի, ստորագրելու մասին խոսք լինել չի կարող:

Ըստ թուրք նախարարի` Հայաստանի հետ էներգետիկ համագործակցության հեռանկարներ կարող են բացվել միայն այն բանից հետո, երբ հայկական ուժերը դուրս գան իբր «ադրբեջանական տարածքներից»:

«Այդ ժամանակ Հայաստանի առջև ճանապարհ կբացվի նաև տարածաշրջանային նախագծերին մասնակցելու առումով»,- ըստ թուրքական «Հաբեր X» լրատվական կայքի` հավելել է Թուրքիայի արտգործնախարարը:

Միևնույն ժամանակ Դավութօղլուն նշել է, որ Թուրքիան Հայաստանի նկատմամբ էմբարգո չի կիրառում` հիշեցնելով, որ Հայաստանն իր տարանցիկ բեռնափոխադրումները երրորդ երկրներկի միջոցով իրականացնում է Թուրքիայի տարածքով, երկու երկրների միջև գործում են չարտերային չվերթներ, իսկ Թուրքիա մեկնած ՀՀ քաղաքացիներին տրվում է մուտքի արտոնագիր (վիզա):

Դավութօղլուն տեղեկացրել է, որ «Սևծովյան տնտեսական համագործակցություն» կազմակերպության նիստին մասնակցելու նպատակով 2013-ի դեկտեմբերի 12-ին Երևան կատարած իր այցի ժամանակ թեև հանդիպում է ունեցել ՀՀ արտգործնախարարի հետ, բայց կողմերի միջև որևէ համաձայնագիր չի ստորագրվել:

Ermenihaber.am