Թուրքիայի խորհրդարանի նախագահը և ԱՄՆ դեսպանը խոսել են հայ-թուրքական հարաբերություններից

Քաղաքական07:08, 02 Հունիս 2014

Թուրքիայի խորհրդարանի նախագահը և ԱՄՆ դեսպանը խոսել են հայ-թուրքական հարաբերություններից

Թուրքիայում ԱՄՆ արտակարգ և լիազոր դեսպան Ֆրենսիս Ռիկարդոնեն իր դիվանագիտական առաքելության ժամկետի լրացման կապակցությամբ հրաժեշտի հանդիպում է ունեցել Թուրքիայի խորհրդարանի նախագահ Ջեմիլ Չիչեքի հետ:

Ինչպես տեղեկացնում է թուրքական «Հյուրրիյեթ» պարբերականի էլ. կայքը, զրույցի ընթացքում կողմերն անդրադարձ են կատարել նաև հայ-թուրքական հարաբերությունների հարցին:

Ռիկարդոնեն հարցրել է, թե ինչու ցյուրիխյան արձանագրություններն այդպես էլ մուտք չգործեցին Թուրքիայի խորհրդարանի օրակարգ: Ջեմիլ Չիչեքն ի պատասխան ասել է. «Ամենամեծ վիրավորանքը, որ կարելի է հասցնել մի երկրի կամ հասարակության, դա նրան ցեղասպանության հանցանքի մեջ մեղադրելն է: Հարաբերությունները դրանից լրջորեն վնասվում են: Օրինակ` հարկավոր էր դրական գնահատել վարչապետ Էրդողանի` ապրիլի 23-ին հղած ուղերձը, բայց, ցավոք, ԱՄՆ-ն այդ հարցում որևէ գնահատականով հանդես չի եկել»:

Այնուհետև Չիչեքը դժգոհել է, որ խնդրի կարգավորման համար Թուրքիան քայլեր է կատարում, բայց Հայաստանից փոխադարձություն չի ստանում: Շեշտել է, որ Թուրքիայի նախագահը և արտգործնախարարն այցով եղել են Հայաստանում: Հարավային Կովկասի խաղաղության համար, կարևոր է համարել հայ-ադրբեջանական հարաբերությունների կարգավորումը ևս: Չիչեքը նաև նշել է, որ ԱՄՆ-ն պետք է ավելի արդար պահվածք ցուցաբերի խնդրի լուծմանը նպաստելու համար:

Ermenihaber.am