ERMENI HABER AJANSI

Թուրքիայում հաճախ է քննարկվում այն հարցը, թե ով է փոխարինելու Ռեջեփ Թայիփ Էրդողանին վարչապետի պաշտոնում, եթե նա առաջադրվի ու ընտրվի հանրապետության նախագահ 2014-ի օգոստոսին: Վերլուծական հրապարակումներում շրջանառվում են տարբեր անուններ: Մասնավորապես իշխանությանը մոտ կանգնած «Յենի Շաֆաք» պարբերականի սյունակագիր ԱբդուլՔադիր Սելվինը նշում է, որ թեև նախընտրական կողմնորոշումների այս շրջանը շատ դինամիկ գործըթնաց է, բայց, այնուամենայնիվ, ամենահավանական թեկնածուն դեռևս մնում է ներկայիս նախագահ Աբդուլլահ Գյուլը:

Ըստ Սելվինի` սոցհարցումներն ու կուլիսային խոսակցությունները ևս վկայում են այն մասին, որ Էրդողանին փոխարինող ամենահավանական անձը Գյուլն է: Սելվին նշում է, որ իշխող «Արդարություն և զարգացում» կուսակցությունում (AKP-ԱԶԿ) չի քննարկվում, թե ով է առաջադրվելու նախագահական ընտրություններում, քանի որ դա լինելու է Էրդողանը:

Սոցիոլոգիական հետազոտություններից պարզ է դարձել, որ Թուրքիայի բնակչության 30.2 տոկոսը նախագահի աթոռին ցանկանում է տեսնել Էրդողանին: Իսկ 16-17 տոկոսը կամենում է Աբդուլլահ Գյուլի վերընտրությունը նախագահի պաշտոնում: Մեկ այլ կազմակերպության անցկացրած սոցհարցումների համաձայն` Էրդողանի կողմնակիցները կազմել են 37 տոկոս, Գյուլինը` 25 տոկոս:

Իշխող «ԱԶԿ»-ի ղեկավարի հավանական թեկնածուների առաջատարը դարձյալ մնում է Աբդուլլահ Գյուլը: Նրա հետ միասին շրջանառվում են նաև փոխվարչապետ Բյուլենթ Արթընչի, արտգործնախարար Ահմեթ Դավութօղլուի անունները:

Ermenihaber.am