Կարսի բնակիչներին կոչ է արվել խնայողաբար օգտվել ջրից. 1 տարվա պաշար է մնացել

Տնտեսական13:15, 04 Հունիս 2014

Կարսի բնակիչներին կոչ է արվել խնայողաբար օգտվել ջրից. 1 տարվա պաշար է մնացել

Կարսում խմելու և ոռոգման ջրի անբավարարության խնդիր կա: Մինչև 2050 թվականը խմելու և օգտագործելու ջրի պահանջը հոգալու համար Սելիմի շրջանի Բայբուրթ գյուղով անցնող Բոզքուշ գետի վրա կառուցված ջրամբարում մնացել է ընդամենը 1 տարվա ջրային պաշար: Այս մասին, ըստ «Ջումհուրիյեթ» պարբերականի, ահազանգել է Կարսի փոխքաղաքապետ Ֆերիթ Յերինջեն և բնակիչներին կոչ արել խնայողաբար օգտվել ջրից: Վերոնշյալ ջրամբարը կառուցվել է 1995-ին, շահագործման հանձնվել 2011-ին:

Բանն այն է, որ վերջին տարիներին տեղումների քանակը կտրուկ նվազել է, ինչի հետևանքով էլ Բայբուրթի ջրամբարում պահեստավորված ջրի պաշարներն ավելի արագորեն են սպառվում: Միայն այս տարի արդեն ջրամբարից մատակարարվել է ջրային պաշարների 70 տոկոսը, ինչն էլ մեծ անհանգստություն է առաջացրել: Փոխքաղաքապետը տեղեկացրել է, որ ամեն օր պողպատյա խողովակներով ջրամբարից դուրս է բերվում 22.000 խմ ջուր: Հիմա ջրամբարում մնացել է ընդամենը 9 մլն խմ ջուր, որը կբավականացնի լավագույն դեպքում 1 տարի: Քաղաքապետարանը ձեռնամուխ է եղել ջրի այլընտրանքային աղբյուրների որոնման գործին:

Ermenihaber.am