Մոսուլում ահաբեկիչները գերեվարել են թուրքական հյուպատոսարանի 49 աշխատակցի

Տարածաշրջան06:42, 12 Հունիս 2014

Մոսուլում ահաբեկիչները գերեվարել են թուրքական հյուպատոսարանի 49 աշխատակցի

Պաշտոնական Անկարան տագնապալի դրության մեջ է հայտնվել այն բանից հետո, երբ «Իրաքի և Լևանտի իսլամական պետություն» (IŞİD) ահաբեկչական խմբավորման զինյալները, գրավելով Իրաքի Մոսուլ քաղաքը, ներխուժել են տեղի թուրքական հյուպատոսարան և գերեվարել 49 հոգու, այդ թվում և գլխավոր հյուպատոս Օզթյուրք Յըլմազին: Այդ դեպքի կապակցությամբ Թուրքիայի նախագահական նստավայրում արտակարգ խորհրդակցություն է տեղի ունեցել նախագահի, վարչապետի, հետախուզության պետի, ԶՈւ գլխավոր շտաբի պետի, փոխվարչապետի ու փոխարտգործնախարարի մասնակցությամբ: Իսկ արտգործնախարար Ահմեթ Դավութօղլուն ընդհատել է ԱՄՆ կատարած այցը և շտապ վերադարձել Թուրքիա: Նյու-Յորքի օդանավակայանում լրագրողների հետ հանդիպմանը նա հայտարարել է, որ եթե Մոսուլում Թուրքիայի քաղաքացիներին վնաս պատճառվի, ապա դրան հաջորդելու է շատ կոշտ պատասխան գործողություն:

Ինչպես հայտնում է թուրքական «Աքիթ հաբեր» լրատվական կայքը, շուրջ 2 ժամ տևած խորհրդակցության ժամանակ քննարկվել են թուրք պատանդների ազատ արձակման հնարավոր տարբերակները: Որոշվել է նախ դիվանագիտական ճանապարհով հասնել թուրք հյուպատոսի և անձնակազմի մյուս անդամների ազատ արձակմանը: Իսկ եթե դա հաջողություն չունենա, ապա սեղանին կդրվի հարցի լուծման այլընտրանքային տարբերակները, այդ թվում և` ռազմականը:

Թուրքիան ՆԱՏՕ-ին կոչ է արել, արտահերթ ժողով գումարել և քննարկել Մոսուլի իրավիճակը:

«Վաթան» պարբերականն էլ տեղեկացնում է, որ վերոնշյալ խորհրդակցությունից հետո Անկարային հաջողվել է կապ հաստատել «IŞİD»-ի գրոհայինների հետ և տեղեկանալ, որ թուրք պատանդների առողջական վիճակը լավ է:

«Հնարավոր է, որ թուրք պատանդները ազատ կարձակվեն: Այս պահին ռազմական օպերացիայի հարցը օրակարգում չէ»,- գրում է պարբերականը:

Ermenihaber.am