Թուրքիայի նախագահական ընտրություններին ընդառաջ ամենաբարձրն Էրդողանի վարկանիշն է

Տարածաշրջան14:04, 23 Հունիս 2014

Թուրքիայի նախագահական ընտրություններին ընդառաջ ամենաբարձրն Էրդողանի վարկանիշն է

Թուրքական «ORC» ուսումնասիրությունների կենտրոնը Թուրքիայում օգոստոս ամսին սպասվող նախագահական ընտրություններին ընդառաջ երկու առանձին սոցհարցում է կազմակերպել, որոնցից մեկում իշխող «Արդարություն և զարգացում» կուսակցության (ԱԶԿ) թեկնածու է նշվել գործող վարչապետ Ռեջեփ Թայիփ Էրդողանը, իսկ մյուսում՝ նախագահ Աբդուլլահ Գյուլը:

«Ժողովրդահանրապետական» և «Ազգայնական շարժում» կուսակցությունների միասնական թեկնածուն Էքմելեդդին Իհսանօղլուն է: Ենթադրվում է, որ որպես «Ժողովուրդների դեմոկրատական» կուսակցության թեկնածու հանդես է գալու Սալահետդին Դեմիրթաշը:

Թուրքական «Գազեթե 24» լրատվական կայքի հաղորդմամբ՝ միայն իշխող ԱԶԿ-ն դեռ պաշտոնապես չի ներկայացրել իր թեկնածուին:

Հունիսի 18-ից 21-ը 3026 մարդու մասնակցությամբ 32 գավառում անցկացված հարցման արդյունքների համաձայն՝ Էրդողանն անհամեմատ ավելի «քվեներ» է ստացել, քան որպես այլընտրանք առաջադրված Էքմելեդդին Իհսանօղլուն ու Սալահետդին Դեմիրթաշը:

Սպասվում է, որ Էրդողանը, ում վարկանիշը 50%-ից բարձր է, նախագահ կընտրվի առաջին փուլի արդյունքներով:

Ermenihaber.am