Էրդողանը պաշտոնապես նախագահի թեկնածու առաջադրվեց

Տարածաշրջան12:11, 01 Հուլիս 2014

Էրդողանը պաշտոնապես նախագահի թեկնածու առաջադրվեց

Թուրքիայում կառավարող «Արդարություն և զարգացում» կուսակցության (ԱԶԿ) փոխնախագահ Մեհմեթ Ալի Շահինը պաշտոնապես հայտարարել է, որ Թուրքիայում օգոստոսի 10-ին սպասվող նախագահական ընտրություններում ԱԶԿ-ի թեկնածուն Թուրքիայի ներկայիս վարչապետ Ռեջեփ Թայիփ Էրդողանն է:

Ըստ թուրքական «Միլլիյեթ» պարբերականի` նախագահի թեկնածուի ներկայացման նպատակով ԱԶԿ-ի հրավիրված ժողովին մասնակցել է 4000 մարդ: Հայտարարությունից հետո ելույթ է ունեցել նաև Թայիփ Էրդողանը:

Այժմ հայտնի է, որ ընտրություններում Էրդողանի մրցակիցներն են ընդդիմադիր ուժերի` «Ժողովրդահանրապետական» և «Ազգայնական շարժում» կուսակցությունների առաջադրած միասնական թեկնածու Էքմելեդդին Իհսանօղլուն և քրդական «Խաղաղություն և ժողովրդավարություն» կուսակցության թեկնածու Սելահաթթին Դեմիրթաշը:

Նշենք, որ Թուրքիայի 12-րդ նախագահն առաջին անգամ ընտրվելու է ժողովրդի ուղղակի քվեարկությամբ: Օգոստոսի 10-ին նախանշված ընտրությունների առաջին փուլում թեկնածուներից որևէ մեկի հաղթանակ չտանելու դեպքում օգոստոսի 24-ին կկայանա 2-րդ փուլը:

Ermenihaber.am