Թուրքիայի ԱԳՆ. Սահմանի բացման մասին լուրերը չեն համապատասխանում իրականությանը

Քաղաքական07:01, 05 Հուլիս 2014

Թուրքիայի ԱԳՆ. Սահմանի բացման մասին լուրերը չեն համապատասխանում իրականությանը

Թուրքիայի արտաքին գործերի նախարարությունից հերքվել են նախօրեին մամուլում տարածված լուրերն այն մասին, թե թուրքական իշխանությունները նախապատրստվում են բացել հայ-թուրքական սահմանի Ալիջանի անցակետը:

Թուրքիայի արտգործնախարարության խոսնակ Թանժու Բիլգիչը տեղեկացրել է, որ սահմանի բացման մասին խոսակցությունները չեն համապատասխանում իրականությանը: Բիլգիչն ընդգծել է, որ Հայաստանի հետ սահմանը փակվել է «Ադրբեջանի հողերի գրավման պատճառով» 1993-ին:

«Սահմանի բացումը, սակայն, Հարավային Կովկասում համապարփակ խաղաղության և կարգավորման գործընթացի համար հնարավորություն ապահովող զարգացումների շրջանակներում կարող է գալ օրակարգ: Այդ հարցում որոշիչ է լինելու բոլոր հարևանների հետ ունեցած խնդիրների լուծման համար Հայաստանի կողմից կամքի դրսևորումը և դրան համապատախսան քայլեր կատարումը»,- ըստ արտգործանախարության պաշտոնական կայքի` ասել է Թանժու Բիլգիչը:

Հիշեցնենք, որ թուրքական ընդդիմադիր «Թարաֆ» թերթը տեղեկություն էր տարածել այն մասին, թե Թուրքիայի վարչապետը 1915-ի կապակցությամբ հայերին հղած ցավակցական ուղերձից հետո պատրաստվում է երկրորդ քայլը կատարել. բացել 1993-ից փակված հայ-թուրքական սահմանը: Նշվում էր, թե վարչապետ Էրդողանի կողմից արդեն տրվել է հրահանգ ավարտին հասցնել Ալիջանի սահմանային անցակետի բացման նախապատրաստական աշխատանքները:

«Թեև դեռ հստակեցված չի սահմանի պաշտոնական բացման ժամանակացույցը, բայց կուլսիներում խոսակցություններ կան, որ սեպտեմբերից հետո հավանաբար կբացվի»,- գրել էր «Թարաֆ»-ը:

Ermenihaber.am