Թուրքիայում ստեղծված նոր կուսակցության շուրջ մեծ հետաքրքրություն է առաջացել

Տարածաշրջան16:01, 07 Հուլիս 2014

Թուրքիայում ստեղծված նոր կուսակցության շուրջ մեծ հետաքրքրություն է առաջացել

Այսօր Թուրքիայում հայտարարվել է այդ երկրի 80-րդ կուսակցության հիմնադրման մասին: Նոր ստեղծվող «Կենտրոնական» կուսակցության նախագահությունը ստանձնել է դոկտոր պրոֆեսոր Աբդուրրահին Քարսլըն:

Թուրքական «Հաբեր էվեթ» լրատվական կայքի հաղորդմամբ՝ նոր ստեղծված կուսակցության շարքերին են անդամագրվել Թուրքիայի քաղաքական դաշտում կարևոր դերակատարություն ունեցող կուսակցությունների՝այդ թվում նաև կառավարող «Արդարություն և զարգացում» կուսակցության շարքերից հեռացած քաղաքական գործիչներ:

Թուրքական մամուլում նոր ստեղծվող կուսակցությունը կապում են Գյուլենական շարժման (Գյուլենական համայնք) հետ: Դրա համար պատճառ են դարձել ավելի վաղ տարածված այն խոսակցությունները, որոնց համաձայն Ֆեթոլլահ Գյուլենը պատրաստվում է քաղաքական կուսակցություն ստեղծել, իսկ կուսակցության ամենահավանական թեկնածուն համարվում էր նույն Աբդուրրահին Քարսլըն:

Լրագրողների հարցին, թե արդյո՞ք կուսակցությունը կապ ունի Գյուլենական շարժման հետ, Քարսլըն պատասխանել է, որ ինքը հավատացյալ, ազգայնական և պահպանողական քաղաքական գործիչ է, սակայն երբեք Գյուլենական համայնքի անդամ չի եղել և չի հարում այդ շարժմանը:

Ermenihaber.am