Ծրագրվում է Վանից չվերթներ իրականացնել դեպի Հայաստան

Տարածաշրջան07:24, 10 Հուլիս 2014

Ծրագրվում է Վանից չվերթներ իրականացնել դեպի Հայաստան

Հիմնադրվում է «Վանի ավիաուղիներ» օդային փոխադրումների ծառայությունը, որի նպատակը Վանի տնտեսական և զբոսաշրջային ներուժի վրա ուշադրություն հրավիրելն է: Նախաձեռնողները Ստամբուլում և Վանում բնակվող մի խումբ գործարարներ են:

«Հաբեր Վան» լրատվական կայքը տեղեկացնում է, որ «Վանի ավիաուղիներ» բաժնետիրական ընկերությունը ասպարեզ է մտնում 3 մլն դոլար կապիտալով: Ընկերության բաժնետոմսերի վաճառքը բաց է քաղաքացիների առաջ և ցանկացողները կարող են մասնաբաժին ունենալ` սկսած 10.000 թուրքական լիրայից: Սակայն նույն ընտանիքից առավելագույնը 2 հոգի կարող են բաժնետոմս գնել մինչև 100.000 լիրայի չափով:

«Վանի ավիաուղիներ»-ի հիմնադիրների թվում են Վանի առևտրա-արդյունաբերական պալատը, Վանի առևտրային բորսան, Վանի արհեստագործական պալատների միությունը, Վանի հիմնադրամը: Ըստ նախատեսվածի` առաջին չվերթն իրականացվելու է 2015-ի ապրիլի 2-ին: Ամեն օր կայուն սակագնով լինելու են Վան-Անկարա-Վան, Վան-Ստամբուլ-Վան չվերթներ:

Սկզբնական շրջանում ընկերությունը վարձակալելու է 180 ուղևորի համար նախատեսված 6 հատ Boing 737 տեսակի ինքնաթիռ: Հետագայում իր կապիտալը 50 մլն դոլարի հասցնելու դեպքում «Վանի ավիաուղիներ» բաժնետիրական ընկերությունը ծրագրում է գնել DC 9 տեսակի ինքնաթիռներ և չվերթներ իրականացնել նաև դեպի Հայաստան, Իրան, Իրաք և Վրաստան:

Ermenihaber.am